Bhutan lal-in Assam trade hub a tlawh

Bhutan lal, King Jigme Khesar Namygel chuan Inrinni liam ta khan lower Assam-a Jogighopa hmuna International Multimodal Logistics Park (MMLP) sak lai a tlawh. He hmun hi zawh fel a nih hunah chuan India, Bhutan leh Bangladesh te insumdawnna kawnga hmun pawimawh tak tur a ni.

King Jigme hi MMLP-ah hian minute 90 vel a awm a, India rama Bhutan ambassador leh official eng emaw zatin an ṭawimawm. He hmun hi Gelephu, Bhutan aṭanga km 91, Bangladesh ramri aṭanga km 108 leh Guwahati aṭanga km 147-a hlaa awm a ni. Sorkar laipui flagship Bharatmala Pariyojana hnuaia ram chhunga hetiang logistic park siam hmasak ber a ni. Ram acre 317-a zauah siam niin, National Highways and Infrastructure Development Corporation Ltd (NHIDCL) chu he project kalpui tur, implementing agency a ni.

MMLP ah hian infrastructure pawimawh tak tak dah niin, warehouse, railway sidings, cold storage, custom clearance house, cargo yards, workshop, fuel station, parking bay, admin block, lodging facility, eatery leh water treatment plant te an awm.

Bhutan sorkar chuan he park hi a ngaihven hle a, February thlaa Jogighopa Inland Water Terminal hawn a nih pawh khan minister kaihhruaiin palai a rawn tir tawh a ni.

Assam cabinet minister Jayanta Malla Baruah chuan MMLP hlawhtlinna atan hian a bul hnaia awm, Gelephu Mindfulness City chuan a thawh hlawk dawn hle a ni, a ti.

Assam leh Bhutan hian boruak ṭha tak neiin, nikum Dcember thla khan Assam chief minister Himanta Biswa Sarma chuan ni li chamin Bhutan hi a lo tlawh tawh bawk a ni. Hei bakah kumin kumtir lama Guwahati-a ni hnih awh Advantage Assam 2.0 investment summit-ah khan Bhutan pawh a rawn tel a ni.