Tripura: Sorkarin tuilian venna atan Rs vbc 150 ruahman

Tripura sorkar chuan state puma tuilian laka invenna, embankment siamṭhat leh enkawl hna thawhna atan Rs vbc 150 a ruahman tih Public Works Deparment secretary, Kiran Gitte chuan a sawi.

Thawhlehnia civil secretariat-a press conference-ah Gitte chuan, “Kailashahar Manu lui kam, Belonia-a Muhuri lui dung, Agartala-a Howrah leh Katakhal canal-ah te project lian tham tak tak kalpui mek a ni a, heng project atana sum sen tur hi cheng vaibelchhe 150 vel a ni,” a ti.

Project thawh chungchang chipchiar zawka sawiin, “Manu luiah hian Kailashahar bula hmun hlauhawm pali chu March thla tir aṭang khan siamṭhat mek niin, a siamṭhatna atan hian Rs vbc 28 pawm a ni. Investment lian ber, Rs vbc 77 chu Belonia-a Muhuri lui embankment km 7.47 a thuia anti erosion measure system siamna atan tih a ni a, district dang aṭangin engineer dah luh tum a ni,” tiin a sawi.

State khawpui Agartala-ah sorkarin Howrah lui kam siamṭhat leh enkawlna tur bakah Katakhal lui kama venhimna thar siamna tur Rs vbc 41 ruahman a ni, a ti. “Sonamura-a Durgapur leh Gajaria embankment-ah te leh Sat Chand block, Gobindamath embankment-ah te pawh hetiang venhimna hna hi kalpui mek a ni,” tiin a tarlang.

Chief minister Manik Saha pawhin Union Home Minister chu thil awmdan a sawipui tawh tih sawiin, tuilian vanga chhiatna thleng thei apiang hmachhawn turin Public Works (Water Resources) leh Disaster Management department-te chuan ruahmanna an siam a, sorkarin mipui nunna leh thil neih venhim kawngah hma nasa taka a lak avangin mipuite chu hlauthawng lo turin a ti bawk.