Assam : Police-te'n AIUDF MLA an man

Assam Police-te chuan Jammu and Kashmir-a Pahalgam hmuna firfiakte pawikhawihna rapthlak tak thlen hnua Pakistan humhimtu nia puh, eptu pawl All India United Democratic Front (AIUDF) MLA Aminul Islam chu Ningani khan an man. Hemi chungchangah hian AIUDF chuan legislator thiltih chu a mimal ngaihdan a nih thu leh party a inrawlh loh thu an sawi ve nghal. Dhing biala term thum chhung MLA lo ni tawh, Islam hi Nagaon district-a a chenna in aṭangin man a ni a, nimin Zirtawpni khan court-ah hruai a ni.

Superintendent of police (SP) Swapnaneel Deka chuan social media-a video thehdarh, Dhing bialtu MLA Islam-a'n tun hnaia Pahalgam-a firfiakte beihna chungchangah thu dik lo tak tak a sawi lai hmuh a nih thu a sawi. MLA-in firfiakte a humhim dan an enfiah hnuah, Assam police-te chuan Bharatiya Nyaya Sanhita section 152, 196, 197(1), 113(3), 352 leh 353 hmangin thu dik lo leh a ṭha lo lama rilru kaihruai thei thu a thehdarh avangin thubuai an ziak lut.

Assam chief minister Himanta Biswa Sarma chuan X-ah thuchhuah siamin, "Hetianga rapthlak taka pawikhawihtute humhimtu chu India ram leh hnam dodaltu an ni" a ti. CM Sarma chuan press conference-ah thu sawiin, police-te chu hma la turin a hriattir a, "MLA hi court hmaah hruai a ni ang a, thutlukna dik tak siam a ni ang." tiin a sawi. Chief Minister chuan Pahalgam-a firfiakte pawikhawihna thlenga thi mi 26 chhungte chu zangnadawmna Rs nuai 5 pek an nih tur thu a puang bawk.