AP-a JDU MLA 6-in BJP zawm

Arunachal Pradesh-a Janata Dal United (JDU) MLA paruk chuan rorellai party, Bharatiya Janata Party (BJP) an zawm. 

Assembly seat 60 awmna, Arunachal Pradesh-ah hian JDU hian MLA pasarih a nei a, mahse an zinga parukin an phatsan tak avangin  MLA pakhat chauh a nei dawn ta a ni. 

BJP-a inpe, JDU MLA zinga pathumte hi party duhdan kalha an chet avangin show-cause notice pein, JDU chuan a lo suspend tawh a ni. Nitish Kumar-a party, JDU leh BJP hi NDA hnuaiah an thawk dun a, Bihar-ah pawh ṭangrual sorkar an siam an ni. Arunachal Pradesh-ah hian thawk dun lo mah se, JDU hian BJP sorkar hi a thlawp a ni.

 

JDU MLA-te bakah People's Party of Arunachal (PPA) MLA neihchhun pawhin BJP hi a zawm bawk. BJP hian assembly-ah seat 48 a nei ta a, Congress leh National People's Party (NPP) in member pali ve ve, JDU-in pakhat leh indepedent MLA pathum an awm.