Tripura MLA lakah FIR thehlut

Tripura chief minister Biplab Kumar Deb leh a kaihhruai BJP MLA ṭhenkhat inkar boruak a la ṭha lo chho zel. 

Ningani  khan state sorkar chuan BJP MLA Sudip Roybarman lakah FIR a thehlut. Health minister hlui, MLA Roybarman hi Cancer Hospital, Atal Bihari Vajpayee Regional Cancer Centre tia a hming thlak takah dan loa prime minister hlui Atal Bihari Vajpayee lim dahah puh a ni. Hei vang hian a lakah FIR hi thehluh a ni a, hei hi thla ruk chhunga BJP sorkarin Roybarman laka FIR a thehluh ṭum thumna a ni bawk. 

Police-te chuan hospital-a medical superintendent in complaint a thehluh hnu hian sorkar hmuna dan phalna loa Vajpayee lim siamnaa thawktu mi pathumte chu man an ni tawh niin an sawi.

MLA Roybarman hi chu man a la ni loh bakah police lam hian an la bepawp lo. Dan kalha Vajpayee lim daha an puhna chu thu dik lo a nih thu sawiin, medical superintendent hnenah hian mi lim siam dilna hi a thehlut a, a dilna hi tumahin an dodal sak lo niin a sawi thung.