Meghalaya: Shillong-in Rozgar Mela nei

Meghalaya khawpui, Shillong-a State Convention Centre-ah Rozgar Mela neih a ni a, union minister Pabitra Margherita-a chuan sorkar laipui hnuaia hna hmute hnenah appointment letter a sem.

Rozgar Mela hi April 26 khan ram chhung hmun 47-a a ruala neih niin Rozgar Mela vawi 15-na a ni. Sorkar laipui hnuaia department hrang hranga thawk turte hnenah appointment letter 51,000 chuang sem a ni. Thawk tur lak tharte hi ministry leh department hrang hrang ami niin Income Tax, Department of Posts, Geological Survey of India, Indian Railways, Revenue, leh Labour and Employment te pawh an tel.

Union minister Margherita chuan meta chu India ram chak zawk dinna tur kawng a ni tiin, hna thawk lak tharte chu

mimal hlawhtlinna piah lama an chanvo pawimawhzia a sawi a, ram ṭhanlenna tura theihtawp chhuah turin a fuih.

Shillong Income Tax chief commissioner N. Longvah chuan thawktu lak tharte chu lo lawmin, PM Modi kaihhhruainaa Rozgar Mela chu buatsaih ṭhin chu mimal hlawhtlinna chauh ni loin ram chhunga mipui rawngbawlna tih chakna tura hmalakna a ni, tiin a sawi.

Prime minister Narendra Modi chuan video conference hmangin hmun hrang hranga Mela buatsaih hi a hmanpui a, ram hmasawnna kawnga ṭhalaite tel a pawimawhzia sawiin, "Ṭhalaite'n hnam dinna kawnga nasa taka an thawh hian ramin hmasawnna chak zawk a nei a, khawvel pum huapin hriat kan hlawh a ni," a ti.

PM Modi chuan India ṭhalaite tana remchang siamsaktu sorkar hmalaknate tarlangin, " India ṭhalaite hian khawvel hmaah kan theihna ropui tak kan lantir a, inpekna leh thil thar siamna hmangin kan lantir dawn a ni," tiin a sawi bawk.