Assam: NDA-in Panchayat inthlanpuiah hnehna chan beisei

Assam Deputy Speaker leh BJP hruaitu, Numal Momin chuan BJP kaihhruai National Democratic Alliance (NDA) chuan panchayat inthlan lo awm turah hnehna an chan ngei a rin thu a sawi. "BJP kaihhruai NDA chuan Zilla Parishad leh Anchalik Panchayat-ah seat 300 chuang a la tawh a ni," tiin Panchayat inthlanpah seat 80% an lak theih a beisei thu a sawi bawk.

Kum 2026 Assembly inthlan lo awm tur thlirin, Momin chuan Panchayat result hian BJP kaihhruaina hnuaiah hnathawhna chak tak neih theihna tur kawng a siam dawn niin a sawi. Assembly inthlan lo awm turah BJP kaihhruai NDA chuan seat 104 leh 108 inkar an lak ngei a rin thu a sawi bawk. Panchayat inthlan zawhah eptu pawl, a bik takin Congress chu an che buai hle dawn a, kum 2026 inthlanpui neih turah hnehna an chan a rin loh thu a sawi.

Eptu pawlte chu agenda chiang tak an neih loh avangin Momin chuan a sawisel bawk. "Congress telin eptu party-te chu tunah chuan an dinhmun a ṭha lo hle a, kum 2026 inthlan neih thlengin an chak zo dawn lo' tiin, mipuiin an hnawl tawh thu leh inthlanpui lo awm turah BJP in hnehna an chan tur thu inringtawk takin a sawi a ni.

Panchayat inthlan hi thawh hniha neih a ni dawn a, May 2-ah district 14-ah neih a ni ang a, May 7-ah district dang 13-ah neih a ni ang. May 11 hian vote chhiar a ni ang.