Cabinet-in greenfield highway project siamna tur pawm

Prime minister Narendra Modi kaihhruai Cabinet Committee on Economic Affairs chuan Meghalaya Mawlyngkhung leh Assam Panchgram inkara km 166.8-a thui, four-lane greenfield access-controlled highway siamna tur project, Rs vbc 22,864 senna tur chu Nilaini khan a pawm. He project hi Hybrid Annuity Mode (HAM) hnuaiah kalpui a ni ang.

Kawngpui siam tur hi Meghalaya-ah km 144.80 niin, Assam-ah km 22.00 a ni thung. National Highway No. 06-a tel, he high-speed corridor hian hmarchhak bial inkalpawhna a thlak danglam dawn a, economy pawh a tih chak phah dawn niin an sawi.

Highway hian Guwahati leh Silchar inkar zin chhung nasa takin a tihtlem phah dawn a ni. Tripura, Mizoram, Manipur, leh Assam Barak Valley-a kal pawhna a ti changtlung ang a,senso pawh a ti tlem ang. Cement leh lungalhthei siamna hmun pawimawh tak tak paltlangin, Meghalaya industry lama hmasawnna kawngah pawh a pui thei dawn a ni. Hmarchhak bial chhunga khualzinte tlawh theihna hmun a tihchangtlung dawn bakah Guwahati, Shillong, leh Silchar airport hmangtute tan pawh a ṭangkai dawn hle a ni.

Four lane kawngpui siam tur hian NH-06-a lirthei tawt lutuk a ti ziaawm dawn a, NH-27, NH-106, NH-206, leh NH-37 te nen pawh a inthlunzawm ang. District pawimawh tak tak, Meghalaya-a Ri Bhoi, East Khasi Hills, West leh East Jaintia Hills, leh Assam-a Cachar te a paltlang dawn a ni.