Tripura : Unemployment rate tlahniam

Tripura chief minister Manik Saha chuan nimin khan state chhunga hna nei lo awm zat chu nasa takin a tlahniam tih a sawi. State sorkarin hna a awm theih nan hma a la mek tih sawiin, langtlang taka hna lak an kalpui hmangin March 2025 thleng khan mi 17,554 hnenah hna a pe tawh a ni, a ti. Kum 2025 chhungin mi 3,554 hnenah sorkar hna pek a ni tawh tih a sawi bawk.

Chief Minister Saha chuan he thu hi Agartala Nazrul Kalakshetra Auditorium-a Education Department hnuaia Under Graduate Teacher (UGT) leh Graduate Teacher (GT) post 228 te appointment letter semnaah a sawi a ni.

“Hun lo awm turah pawh remchang dang pek dan tur ruahmanna siam a ni ang. Sorkar chuan mumal takin engkim a kalpui a, tumah hnawl a tum lo. Langtlang takin Education Department-a thawk tur mi 228 hnena appointment letter pekna tur ruahmanna siam a ni. An zinga mi 66 chu UGT niin, 162 chu GT an ni. Sorkar chuan hnathawk lak dan tur kaihhruaina chiang tak a nei a, state sorkar aiawhin hnathawk tura ruatna lehkha dawngte chu lawmpuina ka hlan bawk a ni,” tiin a sawi.

Hei bakah hian CM Saha chuan TET II exam chu April 27-ah zawhfel a nih thu leh, May 4-ah TET I exam neih a nih tur thu a sawi bawk.