Manipur-a NDA MLA 21 ten 'popular govt' an duh

Manipur-a BJP kaihhruai National Democratic Alliance (NDA) MLA 21 te chuan prime minister Narendra Modi leh union home minister Amit Shah te hnenah President's rule hnuaia awm mek, Manipur-a boruak ṭha leh muanawm a awm theihna turin 'popular government' an duh tih ziakin an thlen.

MLA te hian tualchhung buaina avanga President's rule puan a ni chu a tirah chuan ṭha a ti hle tih an sawi. Mahse February 13-a President's rule puan a nih aṭanga thla hnih chuang hnuah pawh an beisei leh duh dante engmah a thleng lo a, state chhunga boruak muanawm leh pangngai a awm theihna tura hmalakna engmah an hmu lo tih an sawi.

Tuna an dinhmunah chuan state mipui rilruah tharum thawhna leh buaina thleng leh mai tura hlauhthawna a awm reng tih sawiin, NDA MLA te chuan civil society organisation hrang hrang pawhin ualau takin President's rule puan chu an sawisel tawh a, mipui sorkar din thuai an duh thu an aupui tawh a ni, tiin Modi leh Shah hneah hian an sawi a ni.

'Heng pawl hrang hrangte hian kawngzawh leh meeting te huaihawtin, mipuite nawlpui rilru pawh an hruai tawh a ni. Rorellai MLA-te chu mipui sorkar din tura hma la duh lo leh, Manipur-a President's rule puan a nihna chhanah mawhphurtuah an puh tawh a ni," tiin lehkha an thehluhah hian an ziak.

PM Modi leh union minister Shah hnena lehkha thawnah hian BJP MLA 13, National People's Party (NPP) leh Naga People's Front (NPF) MLA pathum ve ve bakah independent MLA pahnihten an hming an ziak. Hetih lai hian chief minister hlui N Biren Singh bakah amah thlawptu MLA te erawh chuan an hming an ziak ve lo. Kuki-Zo hnam aṭanga BJP MLA pasarih pawhin hming an ziak ve lo bawk.

Manipur state assembly-ah hian member 59 awm mekin, an zinga 37 chu BJP member an ni a, NPP hian MLA paruk, NFP-in panga, Congress-in panga, Kuki People's Aliance in pahnih, JD(U) in pakhat neiin independent MLA pathum an awm bawk. Seat khat chu a bialtu MLA a thih vangin a ruak mek a ni.

Hun rei tak Meitie leh Kuki-Zo hnam inkar buaina chhuak chingfel theih loha a awm hnua N Biren Singh chuan Manipur chief minister a nihna aṭangin banna a thehlut a, mahse a ban hnuah a thlaktu tur hi NDA hian a thlan theih loh avangin February 13, 2025 khan President's rule puan a ni.

Manipur Congress hotu Keisham Meghachandra chuan NDA MLA-te thiltih dan chu a sawisel thung. "Heng MLA te hian Imphal-ah Governor hmuin sorkar an siam theih thu an thlen zawk tur a ni. Mahse Governor hnenah engmah sawi loin Prime Minister leh Union Home Minister hnenah lehkha an thawn zawk a, hei hian Manipur-a sorkar thar siam an tum tak tak lo tih a lantir zawk a ni," a ti.