Assam: District 5 huam chhunga station 43-ah inthlan ṭhatna nei

Assam Panchayat inthlan thawh khatna, May 2-a neihah thil dik lo a awm nia hriat a nih avangin May 4 khan polling station 43-ah vote thlak nawn leh a ni. Assam State Election Commission chuan a hmain district 14 huam chhunga panchayat inthlan thawh khatna neih zawh hnua buaina chhuak vangin, heng polling station 43-ah hian inthlan ṭhatna neih a nih tur thu an lo sawi tawh a ni.

Inthlan ṭhatnaah hian Hailakandi-ah station 31, Sribhumi-ah station 8, Lakhimpur-ah station 2, Golaghat leh Majuli-ah station pakhat ve ve an tel a ni. Sribhumi district commissioner Pradeep Kumar Dwivedi chuan, venhimna leh magistrate te kaihhruainain inthlanna muanawm tak neih a nih thu a sawi.

Zirtawpnia Assam district 14 -Tinsukia, Dibrugarh, Sivasagar, Charaideo, Jorhat, Majuli, Golaghat, Lakhimpur, Dhemaji, Biswanath, Sonitpur, Cachar, Hailakandi leh Sribhumi-a panchayat inthlan thawh khatna neiha vote tla zawng zawng chu 70.19% a ni. Inthlan thawh hnihna hi May 7-ah neih tur a ni a, May 11-ah vote chhiar a ni ang.

State Election Commission data aṭanga a lan danin, Tinsukia district-a vote thlak chu 64.71% an ni a, Dibrugarh-ah 68%, Charaideo-ah 71.02%, Sivasagar-ah 72.56%, Majuli-ah 80.02%, Jorhat, 72.15% a ni. Golaghat-ah 69.92%, Dhemaji-ah 77.14%, Lakhimpur-ah 71%, Sonitpur-ah 61%, Biswanath-ah 64.51%, Cachar-ah 73%, Hailakandi-ah 73.5% leh Sribhumi district-ah 64.10% an ni.