Assam : Police-te'n Pakistan thlawptu mi 3 an man

Assam police-te chuan Kashmir-a Pahalgam firfiakte pawikhawihna thlen hnua Pakistan thlawpna lantir nia sawi te chu Pathianni khan district hrang hrang aṭangin mi pathum an man leh. Barpeta police-te'n Azibor Rehman an man a, Hojai police-te'n Joynal Uddin an man bakah, Pathianni zan dar 8:30 vel khan Chirang police-te chuan Asraful Islam an man bawk a ni.

Hemi chungchangah hian chief minister Himanta Biswa Sarma chuan ‘X’-ah thuchhuah siamin, Pakistan thlawpna lam tih lan vanga man zawng zawng chu mi 42 an tling tawh tih a puang. CM Sarma chuan Assam police-te chuan mimal leh hnam dodalna thuchhuah siamtute lakah chak takin hma an la tih sawiin, hetianga inhnamhnawihna hi ram leh hnam phatsanna a nih thu a sawilang bawk.

Sarma chuan heng mite hian India ram zalenna hmang sualin, Pakistan ramah chuan India nena remna chungchang sawi chu hrem theih thil anga ngaih a nih thu a tarlang. Zirlai, activist leh journalist-te chu hetiang ngaihdan an sawi avangin jail-a khung emaw, tihduhdah emaw an tawh fo thu a sawi. Hei bakah hian Pakistan-in PECA cybercrime dan an hman chu sawiselin, Sarma chuan Baloch, Pashtun leh Sindhi activist-te'n tihduhdahna an tawk chu a ngaihven hle a, mi tam tak chu sipai chanchin dodalna emaw, India laka inhawng tura duhna lantir vangin an awmna chin hriat loha an bo thu a sawi.