Tripura consumer 41% chauhin a hun takah power bill an pe : Power Minister

Tripura power minister Ratan Lal Nath chuan an state-a electric bill pe zat hniam lutuk chu pawi a tih thu a sawi.

Minister chuan consumer zinga 41% chauhin a hun takah bill an pe tih sawiin, Tripura State Electricity Corporation Limited (TSECL) hnuaia power hmangtu zawng zawng nuai 9.87 zingah nuai 4.32 chauhin thla tin bill an pe tla ṭhin.

Civil Secretariat-a media-te hnena thu a sawinaah, Nath chuan Tulasikhar, Hejamara, Mungiakami, leh Jatanbari te chu subdivision-a bill pe ṭha lo record an nih thu a sawi a, consumer 10% vel chauhin bill an pe ṭhin a ni. Official-te'n endikna an neih changin dodalna an tawk fo a, a chang chuan tharum thawhnate a thleng ṭhin, tiin Nath chuan sum lak luhna lama harsatna lian tak awm chu a tarlang.

Minister chuan PM Surya Ghar Muft Bijli Yojana kalpui dan tur a sawilang bawk a, hemi hnuaiah hian amah telin chhungkaw 70-in rooftop solar power plant an nei hlawhtling tawh a, electric bill pawh an pe tawh lo a ni. TSECL aṭangin an surplus power siam chhuah aṭangin sum an dawng zawk ṭhin. Bill hi Rs 8,726 chu a pek hnuhnun ber a nih thu sawiin, rooftop solar plant an dah hnuah TSECL aṭangin Rs 763 refund a dawng a, TSECL hian unit khatah Rs 2.65-in excess power an lei a ni. Ni zung chakna hmanga power dawng ṭhin chhungkaw 70 te hnenah tun thlengin a vaiin Rs 23,902 pek let an ni tawh.

Consumer 266 chuan solar system an hmang tawh a, mi 60 dang data chu national portal-ah upload a ni. Heng zinga 184 chuan subsidy an dawng tawh a, chhungkaw 95-in bank loan hmangin Rs nuai 1.75 solar unit an dah a ni. State chuan he scheme hnuaiah hian chhungkaw 50,000 hman tir a tum a, ni zung chakna megawatt 150 siamchhuah tum niin, chhungkaw 14,000 chuang an inziak lut tawh.