Assam cabinet-in District pahnih thiah remti

Assam cabinet sub-committee meeting, Zirtawpnia neih chuan South Kamrup leh East Kamrup district-te chu district aṭanga paih a remti. Meeting hi Secretariat-ah neih niin, thu pawimawh hrang hrang an ngaihtuah.

Assam-ah hian district 35 awm mekin, heng zinga pasarihte hi Congresss sorkar hun laia din an ni. BJP kaihhruai sorkar chuan South Kamrup leh East Kamrup te chu district aṭanga paih turin ti mah se, Congress sorkarin district-a a hlankai - Charaideo, Hojai, South Salmara-Mankachar, Biswanath leh West Karbi Anglong-te chu tihdanglam a ni lo ang. Parliamentary Affairs, Transport and Industry Minister Chandra Mohan Patowary chuan Congress sorkar hun laiin district pasarih leh sub-division 24 din a nih thu sawiin, a nih tura ang taka a function loh thu a sawi. Patowary chuan district titlem tur hian East Kamrup leh South Kamrup district MLA te chuan rawtna an thlen niin a sawi.

Ruahman dan chuan South Kamrup district chu ṭhiatin, sub-division thar din a ni dawn a, Chaygaon chu headquarters a ni ang. Hetih lai hian East Kamrup district-ah chuan sub-division thar pahnih hawn belh a ni dawn a, Chandrapur leh Somapur-te chu headquarters tura ruahman a ni. Congress sorkar-in a lo din sub-division te chu - Bihpuria-Narayanpur, Naharkatia, Ramkrishna Nagar, Howraghat, Diyungbra, Dakshin Kamrup, Mukalmua, Kalgachia, Moran, Patharkandi, Kathigora, Merapani, Tihu, Sarukhetri, Sar-bhog, Sonapur, Dispur, Guwahati, Azara, Chandrapur, Dhekiajuli, Katlicherra, Lakhipur leh Manik-pur-te an ni. Heng hi siam ṭhat a nih dawn em tih chu la ngaihtuah leh tur a ni ang. Tunah state sorkarin pathum din belh leh tura a ruahman avangin Assam-ah hian sub-division 27 awmin, district 33 a awm tawh dawn tihna a ni ang.

Cabinet meeting-ah hian RIDF-22 scheme sawiho a ni a, state chhunga hna thawhna turin cheng vaibelchhe 1,240 ruahman a nih thu a tarlang. RIDF-22 scheme hi agriculture leh veterinary sector tihhmasawn nan duan a ni a, cheng vaibelchhe 325 pek chhuah tawh a ni. Cabinet chuan veterinary hospital thar 110 din a remti a, godown 57 din a remti bawk. State sorkar flagship project 'Mukhyamantri Samagra Gramya Unnayan Yojana' atan cheng vaibelchhe 30,000 a pawm a, heng sum hmang hian Assam-a thingtlang khaw 25,425 tihchangtlun hna thawh a ni ang. Thingtlang khaw pakhat hian kum nga chhungin cheng vaibelchhe 1.20 an dawng dawn a ni. Sorkar kum kal mekah, Mukhyamantri Samagra Gramya Unnayan Yojana project atan hian vaibelchhe 500 pek chhuah tawh niin, Chief Minister Sarbananda Sonowal chu chairperson a ni a, Finance department chu nodal agency atan thlan a ni bawk.

Cabinet chuan state chhunga martar chhungte hnenah cheng nuai nga ṭheuh pek a remti a, December 10, 2016-ah pek chhuah a ni ang. Heng bakah hian National Ragistration of Citizens kalpui mek ennawn an remti bawk. Meeting chuan state pawn aṭanga thil chawkluh - cell phone, car, lift, furniture, PVC pipe, telephone, camera, tile, marble leh adangah te chhiah 4% lak ṭhin chu 10%-ah tihsan a rel.