Sikkim CM hnenah President-i'n Award hlan

Sikkim Chief Minister Pawan Chamling chu ‘Sustainable Develop­ment Leadership Award’ hlan a ni.

Kar kalta Ningani khan Energy and Resources Institute (TERI) buatsaihin, World Sustainable Development Summit, Vigyan Bhawan-ah neih a ni a, he hunah hian Award hi Presi­dent Pranab Mukherjee chuan a hlan. Chamling hi environment and sustai­nable development lama a hnathawh ṭhat vang te, organic state an nih theih nana a hmalakna te avanga he award hi hlan a ni. Sikkim hi January 2016 khan India rama organic state hmasa berah Prime Minister Narendra Modi chuan a lo puang tawh a ni.

Sikkim-ah hian ram hectare 75,000 zeta zau chu organic farm atan hman a ni a, National Programme for Organic Production Scheme hnuaiah hmalakna kalpui niin, state thar chhuah hi 80,000 million tonne lai a tling a ni. September 16, 2003 khan Sikkim State Organic Board chu din a lo ni tawh a, state sorkar nen ṭangkawpin chak takin hma an la a ni. August 14, 1998 khan Sikkim-ah hian plastic leh ṭawihthei lo hmanraw dangte hman khap a lo ni tawh a, India ramah a hmnasa ber a ni. Heng bakah hian hnimhnah leh rannung aṭanga damdawi lak emaw siam khap a ni a, dan mumal tak siam a ni bawk.

Chief Minister Pawan Chamling chuan kum 2009 aṭang khan programme danglam tak “10 Minutes’ tih chu duangin, hemi hmang hian kum tin June 25-ah mi pakhatin minute 10 chhungin thing pakhat
ṭheuh an phun ṭhin. Heng bakah hian sorkar enkawl ramngawa thing upa tawh tak tak te chu “Sikkim State Heritage Trees” tiin kum 2016 kum tir lam aṭang khan hming pek an lo ni tawh. Sikkim sorkar chuan sorkar functinon leh mipui vantlang punkhawmnaa Plastic Bottle hman te pawh a lo khap tawh bawk a ni.

Heng a hmalakna chhuanawm tak tak te avang hian ‘Sustainable Development Leadership Award’ hi Sikkim Chief Minister Pawan Chamling hnenah hlan a nih thu a buatsaihtute chuan an sawi.