Assam-ah District thiah duh loin nawrh huaihawt

Assam cabinet meeting-in Congress sorkar-in district pasarih a lo pek tawh pasarih zinga pahnih ṭhiah a remtih hnuah lungawi lohna lantir a ni.

Kar kalta khan cabinet meeting chuan South Kamrup district leh East Kamrup district-te chu ṭhiat turin thutlukna a siam a ni. Cabinet thutlukna duh lo hian district pahniha mi ṭhenkhat chuan Inrinni aṭang khan hmun hrang hrangah lungawilohna an lantir. State Parliamentary Affairs, Transport and Industry Minister Chandra Mohan Patowary chuan kar kalta Zirtawpni khan cabinet-in district ṭhiah a remtih thu hi a sawi a, district 35 awm mek chu 33-ah tihhniam tum a ni, a ti. Congress sorkar hun lai khan Assam-ah hian district thar pasarih a piang a, sub-division 24 din a ni bawk. District pek zinga mi Charaideo, Hojai, South Salmara-Mankachar, Biswanath leh West Karbi Anglong-te chu tihdanglam a ni ve dawn lo thung.

Cabinet thutlukna avanga lungawi lo, Chaygaon khaw mipui leh All Assam Students Union (AASU) Chaygaon branch-te chuan rel kawng leh motor kawngpui ṭhenkhat an dang. Lungawi lohna lantirtute chuan South Kamrup district chu infrastructure lamah a pachhe hle tih sawiin, tunah ṭhiat tura thutlukna siam a ni zui leh ta mai chu an hrethiam lo hle tih an sawi. State sorkarin Majuli district-ah hlangkai a, district dang a ṭhiah sak chu an hriatthiam loh thu an sawi. Lungawi lohna hi Boko, Lampi leh Samuria-te pawhin an thlawp tih an sawi. Majuli hi Chief Minister Sarbananda Sonowal-a bial niin, tun hnai khan district-ah puan a ni.

Lungawi lohna lantirtute chuan cabinet thutlukna sut leh a nih theih nana hmalak zel an tum thu an sawi. Hetih lai hian Minister Chandra Mohan Patowary chuan Congress sorkar khan ruahmanna felfai awm loin district a pe nia sawiin, harsatna an tawk tih a sawi. District ṭhiat leh tur hian East Kamrup leh South Kamrup MLA te ngeiin rawtna an thlen niin Patowary chuan a sawi bawk. Cabinet-in a ruahman dan chuan South Kamrup district chu ṭhiatin, sub-division thar din a ni dawn a, Chaygaon chu headquarters-ah dah a tum a ni. East Kamrup district-ah pawh sub-division thar - Chandrapur leh Sonapur-te siam turin ruahmanna a saim bawk.