Assam sorkar-in Mobile tracking system hmang dawn

Assam sorkar chuan state chhunga zirtirtute attendance vilna turin GPS technology hmanga duan mobile tracking system hmang turin ruahmannna a siam.

Assam-ah hian zirtirtu 57,627 zet an awm mek a, a thar lakbelh turin state sorkar chuan hma a la mek bawk. Education Minister Himanta Biswa Sarma chuan, zirtirtute nitina an attendance chhinchhiah nan mobile tracking system chu duan a nih thu sawiin, kum 2017 April thla aṭanga hman a nih tur thu a sawi.

Sarma chuan, state sorkarin zirna a ngai pawimawh hle tih sawiin, hmasawnna tur tam tak a awm tih a sawi. Mobile tracking system hi India ram state dang Gujarat-ah pawh hman a lo ni tawh tih sawiin, NAAC leh grade system hmangin zirtirtute attendance ṭhat leh ṭhat loh teh a nih tur thu a sawi.

Education Minister chuan zirna kawngah hmasawn zel turin hma lak a nih thu leh, higher secondary chinah BPL chhungkuaa zirlaite chu a thlawna admission tihsak an nih tur thu a sawi. Hemi atan hian state sorkar chuan cheng vaibelchhe 43.56 a ruahman niin Himanta Biswa Sarma chuan a sawi bawk.