Assam-ah DEMU rel tlan ṭan

Northeast Frontier Railway (NFR) chuan October 8
aṭang khan Dibrugarh-Tinsukia-Ledo-Dangri section-ah Diesel Electric Multiple Unit (DEMU) rel a tlan tir ṭan.

DEMU hi a bika duan niin, diesel engine hmang a ni. A chuan man pawh tlawm bik tura ngaih a ni a, passenger-te tan a ṭangkai thei hle dawn a ni. Tun hmain hetiang rel hi Assam-ah hian a la awm ngai loh bakah hmarchhak hmun dangah pawh a la awm lo niin NFR Chief Public relation officer Pranav Jyoti Sharma chuan a sawi. DEMU rel hian lu pahnih a neih avangin station aṭangin a duhna lamah a tlan nghal thei a ni. DEMU-ah hian a bika rawih enkawltu mi pariat an awm a, nitin DEMU rel 12 te chu Dibrugarh - Dangri section-ah an tlan ṭhin dawn a ni.

Hetih lai hian Minister of State for Railways Rajen Gohain chuan Madhya Pra-desh-a Bandhavgarh leh Kanha National Park-a ‘Tiger Express’ an tlan tir ang hi Assam-a Kaziranga National Park-ah ‘Kaziranga Express’ tlan tir turin Railway Ministry chuan ruahmanna a siam tih a sawi. Kaziranga National Park hi World Heritage Site-ah puan a ni tawh a, India rama samak 70% zet chu he hmunah hian an awm a ni. Samak bakah hian sakei, sai, lawi, sakhi leh sazuk ṭhahnem tak Park-ah hian an cheng a ni. Kaziranga bakah hian Kamakhya temple, Manas National Park-te chu awlsam zawka tlawhpawhna tur kawngpui siam tum a ni bawk.

Madhya Pradesh-a Ban-dhavgarh leh Kanha National Park-ah te hian World Envi-ronment Day denchhenin ‘Tiger Express’ tlan tir a lo ni tawh a ni. MoS Gohain chuan Prime Minister Narendra Modi chuan kum 2020-ah hmarchhak state-te chu rel hmanga thlunzawm vek a tiam niin a sawi.