CM Bungalow-ah inawkhlum dang awm leh

Arunachal Pradesh Chief Minister hlui Kalikho Pul chu thla hnih liam ta khan Chief Minister Bungalow-ah inawkhluma hmuh a ni. Kar kalta Inrinni khan Chief Minister Bungalow-ah vek hian mi pakhat chu inawkhluma hmuh a ni ve leh ta.

Inawkhlum hmuh hi Sushil Burman niin, CM official bunga-low-a chaw chhumtu a ni. Burman hi zing lam dar 10 velah dining room-a ceiling fan-ah a inkhai hmuh a ni a, a lo thi hman tawh a ni. Burman-a ruang hi Tomo Riba State Hospital-ah postmortem a ni a, a ruang hi a pianna Cooch Behar, West Bengal-ah lak a ni. Burman hian a nupui leh an fapa kum nga mi a kalsan. A inawhhlum chhan tak hi hriat a la ni lo a, police-te chuan thubuai ziak lutin, an chhui zui mek a ni. Hetih lai hian Arunachal Civil Society (ACS) chuan tun hnaia chief minister bungalow-a thihna thleng fo mai chu an ngaih thutak hle tih an sawi a, state sorkar chu hma la turin an phut.

Congress MLA hel hruaitu, Congress sorkar paihthlak a nih hnua Arunachal Pradesh Chief Minister ni zui ta, Kalikho Pul kha he hmunah hian inawkhluma hmuh a lo ni tawh a, sawi zui a hlawh hle. Pul hi Supreme Court-in Arunchal-ah Congress sorkar din leh tura thupek a tihchhuah hnu reiloteah a intihlum a ni.