State te zawk tan Hamthatna hmuh tur a awm lo : Sikkim CM

Sikkim Chief Minister Pawan Chamling chuan Prime Minister Narendro Modi-a kaihhruai NDA sorkar hnuaiah state te zawk te tan hmasawnna leh hamṭhatna hmuh tur a awm meuh lo niin a sawi.

Sikkim Democratic Front (SDF) hruaitu Chamling chuan, tun hnai kum 15-20 chhungin sorkar laipui aṭangin state te zawk te tan hamṭhatna hmuh tur a awm meuh lo, rel kawng leh vansang lama inkalpawhnaah phei chu sorkar chuan a hlamchhiah a ni, a ti. Inkalpawhna ṭha chu hmasawnna atana pawimawh ber a nih laiin, a ṭhat tawk loh zia chu hmuh theihin a awm a ni, a ti. Kum 2009-a Mamata Banerjee-i Railway Minister atan ruat a nih khan, Sikkim-ah rel kawng siamna tur lungphum phum a ni a, mahse tun thlengin puitlin a la ni lo tiin, vansang lama inkalpawhna ṭha zawk nei turin Airport Authority of India (AAI) chuan state te zawkte chu a hlamchhiah a ni, a ti.

Chamling chuan kum 10 kalta khan sorkar laipuiah “peace bonus” a lo dil tawh thu leh, tun thlenga pek an la nih loh thu a sawi. Sikkim chu India rama state ralmuang leh hel awm lohna state a ni, a ti bawk. Chamling chuan state lian leh mihring tamna te chu ngaih pawimawh an nih laiin, state tenau zawk, a bikin hmarchhak state te chu ngaihthah a nih thu a sawi. Chamling hian December 12, 1994 aṭang khan Sikkim Chief Minister nihna a chelh ṭan a, tun thlengin a la chelh. India rama Sikkim organic state hmasa ber a nih theih nana a hnathawh ṭhat avangin tun hnai khan India President chuan chawimawina a hlan a ni.