Manipur-ah Sava hming chawiin khaw hming thlak

Manipur-a Tameng-long district-a Bhalok khua chu sava pem ṭhin, mu chi khat Amur Falcon-te'n kum tin pem nana an hman ṭhin avangin a khawhmingah “Amur Falcon Village” tia thlak a ni dawn.

He thu hi State Forest and Environment, Chief Secretary Shambu Singh chuan, kar kalta Zir-tawpnia neih zawh tak '61st Wildlife Week'-ah a puang a ni. Singh chuan ram mipuite chu ramngaw leh nungcha humhalh kawngah hmasa la sauh sauh tura fuihin, sorkar hmalakna thlawp turin a chah.

Manipur Forest Depart-ment chuan nikum khan Bhalok khua hi “Amur Falcon Village” ah official-in a lo puang tawh a, tunah chuan state sorkar-in official-in a puang ve leh ta a ni. Amur Falcon-te hian kum tin Siberia
aṭangin India hmarchhak hi an rawn pan ṭhin a, thlasik a zawh hnuah an chenna lam an pan leh mai ṭhin. Tamenglong District hi heng sava pem chi te hian an pan nasa a, a venhim kawngah Forest Department, NGO leh nungcha hmangaihtute chu an thawkho ṭhin a ni.