'Switzerland of the East' - Sikkim

Sikkim sorkar chuan UNESCO-in World Heritage Site-a a puan Kanchendzonga leh Kanchendzonga National Park (KNP)-te chu khualzin tam zawk hip nana hman a nih tur thu a puang. Sikkim Chief Minister Pawan Chamling chuang heng hmun te hi 'Switzerland of the East' tiin a sawi hial.

Chamling chuan state sorkar chuan Indian Mountaineering Federation (IMF) thawhpui turin hma a la mek tih sawiin, India rama tlang sang ber Mt Kanchen­junga (8,586 metre) chu khualzin tam zawk hip nana hman an tum thu a sawi. Chamling chuan World Heritage Site-a puan Kanchenjunga National Park (KNP) chu khualzin ten eng emaw chen an fan ve theihna turin ruahmanna siam a nih thu a sawi bawk. KNP chu khualzin tana hmun tlawh chakawm ber te zinga mi a nih thu sawiin, ramsa leh nungcha chi hrang hrang bakah, dil te, vur leh thil chi hrang hrang awmna hmun a nih thu a sawi. State Tourism Department chuan hemi kawnga hmalak nan hian tour and travel agency eng emaw zat din dawn tih sawiin, an enkawl zui tur thu a sawi bawk.

Sikkim Chief Minister chuan state khawpui Gangtok aṭanga khualzin ten Kanchenjunga an fan theihna turin helicopter service tir tum a ni, a ti.

Helicopter hi March leh May inkar leh, September - November-ah te service tir tura ruahman a ni. Mamawh dan a zirin kum tluana service thei tura ruahman a ni bawk. Chamling chuan tlang sang lutuk lo, mipui nawlpuiin an tlawh theih tur metre 7000 vela sang tlang 14 vel zet chu state sorkar hmalaknaa chei ṭhat a nih thu sawiin, hawn theiha peihfel a ni tawh tih a sawi.

Sikkim hi hmarchhak state zinga khualzin dawng hnem ber a ni mek a, kum 2015 khan ramchhung (domestic tourist) leh ram pawn (international tourist) aṭanga tlawhtu mi nuai 7 chuang zet a nei a ni. Kum 2020-ah chuan kum khat chhunga khualzin nuai 15 nei thei turin tunah hian state sorkar chuan hma a la mek a ni. Tourism chu state sorkar sum lakluhna hnar pawimawh a ni chho tawh a, mipui tam zawk 60% vel zet chu tourism industry lama innghat an ni.

Chamling chuan Sikkim-a a hmasa ber ni turin Pakyong-ah Greenfield Airport din tuma hmalak mek a nih thu sawiin, a siam nan cheng vaibelchhe khat vel ruahman a ni a, kum 2017 hawn hman beisei a ni, a ti. Airport hi altitude 4,700 vela sang a ni dawn a, peih fel a nih hunah chuan India rama Airport sang pangana a ni ang. A kalpawhna turin rel kawng km 45-a thui sial tum a ni a, hemi atan hian cheng vaibelchhe 4,190 vel ruahman a ni a, kum 2017 aṭanga hna thawh ṭan hman beisei a ni. He rel kawngah hian lei verh 14 leh, lei dawh 28 a awm ang. Heng bakah hian Bhaleydhunga-ah Cherenzi, Skywalk leh Ropeway-te siam tum a ni a, kum 2025-ah zawhfel hman beisei a ni. Heng zawng zawng hi peih fel a nih hunah chuan India ram mai ni lo, South Asian ram thlenga khalzinte tlawh chak ber hmun ni thei tura ngaih a ni.