AP CM-in Union HRD Minister hnenah mamawh thlen

Arunachal Pradesh Chief Minister Pema Khandu chuan sorkar laipuia Human Resource Development Minister Prakash Javedekar chu hmuin, state mamawh hrang hrang a thlen.

Pema Khandu chuan Union Ministry of Human Resource Development (HRD) hnuaia Model Degree College dinna tur chu Rashtriya Uchatar Shiksha Abhiyan (RUSA) programme anga kalpui a, funding pattern 90:10 hman a nih theih nana hmalakpui turin minister chu a ngen. RUSA hnuaiah hian degree college paruk sakna thawk mek a awm thu a hrilh.

HRD Minister Prakash Javedekar chuan college sak hna chu RUSA guideline anga kalpui a nih tur thu Khandu a hrilh a ni. Khandu chuan Rashtriya Madhyamik Shiksha Abhiyan (RMSA) hnuiah contract-a thawk tur zirtirtu lakbelh tura state sorkar-in a rawtna chu sorkar laipui a pawmsak niin a sawi. RMSA hnuaiah hian Trained Graduate Teachers (TGTs) te chuan thla khatah lawmman Rs. 26,453/- an dawng a ni. Khandu chuan zirtirtu lak belh tur hian state sorkar chuan notification a chhuah thuai dawn tih a sawi.

CM Khandu chuan Javedekar chu RTE Act 2009 hnuaia Comprehensive and Continuous Evolution (CCE) kalpui a nih hnuah, examination system thar hman a ni tih sawiin, 'No Detention Policy' chu titawp tura hmalakpui turin a ngen.

Javedekar chuan education-in hma a sawn theih nana state sorkar hmalakna te a thlawp tlat thu lo hrilhin, a theih anga hmalakpui a tiam a ni. Arunachal Pradesh Chief Minister hi State Government Principal Secretary Jitendra Narayan Singh chuan a ṭawiawm a ni.