Manipur: Governor-in highway project a hun taka zawh a pawimawh thu sawi

Manipur governor, Ajay Kumar Balla chuan Thawhṭanni khan national highway project, a bik takin state chhunga tlangram district pasariha thawh mekte chu a hun taka zawhfel a pawimawh thu a sawi.

Raj Bhavanm, Imphal-a review meeting kaihruaitu Governor hian Manipur puma national highway project kalpui mekte chu uluk taka enfiahin, state chhunga in kalpawhna tih changtlun leh economy ṭhanlenna ti chak turin project hnathawh ṭha tak neih a tul thu a sawi. Heng infrastructure project pawimawh tak takte hi hmasawnna ti khawtlai thei a ni tiin, harsatna awmte sutkian nan ṭha taka hma la turin official-te a hriattir.

Meeting-ah hian tlangram district pasarih - Ukhrul, Noney, Tamenglong, Senapati, Kangpokpi, Churachandpur, leh Pherzawl-a Deputy Commissioner-te chu video conference kaltlangin an tel a ni.

National Highways and Infrastructure Development Corporation Limited (NHIDCL) executive director, M S Deval chuan National Highway project hrang hrang thawh mekte dinhmun kimchang taka sawiin, harsatna lian tham an neih te a tarlang bawk.