Nagaland: Zuk leh hmuam khapna dan khauh taka kengkawh turin hriattir

Nagaland khawpui Kohima Deputy Commissioner leh National Tobacco Control Programme hnuaia District Level Coordination Committee (DLCC) chairman, B. Henok Buchem, NCS chuan district pumah vaihlo leh a kaihhnawih khapna, Cigarettes and Other Tobacco Products Act (COTPA), 2003 khauh taka kalpui a nih theih nan thupek a chhuah.

Deputy Commissioner Office thuchhuah chuan he thupek hi village council zawng zawng, municipal leh town ward, sorkar department, zirna in, sumdawnna hmun, leh mipuite chu zawm turin a ngen.

Sorkar office, healthcare facility, zirna in, lirthei, restaurant, leh intihhlimna hmun hrang hrangah meizuk khap a ni a, he dan hi zawm a nih theih nan "No Smoking" tih langsar taka tarlan tur a ni bawk.

He thupek hmang hian zuk leh hmuam tih larna leh sponsorship chi hrang hrang khap niin, zuk leh hmuam ti lo tura in fuih tumna te a huam a ni. Hei bakah hian kum 18 hnuai lam hnena zuk leh hmuam zawrh khap tlat a ni a, zuk leh hmuam zuarte chuan a leitu kum an finfiah tur a ni. Zirna hmun, college, leh university meter 100-a hlaah zuk leh hmuam zawrh khap a ni bawk.

District thuneitute chu an thuneihna huam chhungah heng dante hi a taka hmang tura hriattir an ni a, dan bawhchhiatna a awm chuan District Nodal Officer, District Tobacco Control Cell, Kohima hnenah hriattir tur a ni. Kohima khawpui hi zuk leh hmuam awm lohna hmun siam tura hma lak mek a ni.