Shillong-ah darkar 48 chhung total curfew puang
Meghalaya sorkar chuan an state khawpui, Shillong-ah Covid-19 kai hmuh a nih ve leh tak avangin nimin zing dar 6 aṭang khan khawpui chhungah darkar 48 chhung atan total curfew a puang nghal.
Thawhṭanni zana Shillong-a Bethany Hospital-a doctor pakhatin coronavirus a kai tih hriat a nih veleh, state sorkar chuan a thawhna damdawi-in chu pawn lam mi tan tlawhpawh phal loin a khar nghal. Damdawi-inah hian damlo admit belh tawh lo tura tih a nih bakah, he damdawi-ina damlo enkawl mekte pawh chhuah tir lo tura tih a ni.
Sorkar chuan March 22 hnu lama Bethany Hospital tlawhtute chu sorkara inhriattir nghal turin a ti a, chief minister Conrad Sangma chuan nimin tlai thleng khan mi 200 vel chhui chhuah a ni tawh tih a sawi. Heng mite hi test vek an ni dawn tih a sawi bawk.