Meghalaya: Dy. CM-in high-level-review meeting kaihruai

Meghalaya deputy chief minister in-charge, Prestone Tynsong chuan Thawhlehni khan Border Security Force (BSF), National Buildings Construction Corporation (NBCC) leh state sorkar official-te nen Bangladesh nena ramri hung loh la awm, km 49-a thui chungchangah high-level review meeting an nei.

Meeting-ah hian Tynsong chuan Khasi leh Jaintia Hills-a Deputy Commissioner-te chu ram chungchang chingfel tur leh ramri hung hna thawh zo thuai turin a hriattir. Tynsong chuan thuthar thehdarhtute a kawmnaah, "BSF leh NBCC hotute hmaah Deputy Commissioner-te nen ramri hung dinhmun thlirletna kan nei a, Deputy Commissioner-te chu ram chungchang chingfel turin ka hriattir tawh a, kar tlemte hnuah he thil hi chinfel a nih theih ka beisei," tiin a sawi.

Bangladesh dinhmun a ṭha lo tih kan hriat vek avangin Deputy Commissioner-te chu he ram chungchang hi ngaipawimawh hmasa ber turin ka hriattir a ni, a ti bawk.

Meghalaya hian Bangladesh nen inrina, km 443-a thui a nei a, heng zinga km 49.216 hi hung a la ni lo.

Union Ministry of Home Affairs chuan Meghalaya sorkar chu he hmun hi firfiak hluarna leh, dan loa pem lut tamna a nih avangin hung hna thawk thuai turin a lo hriattir tawh a ni.

MHA official chuan ramri hung chu ramri venhimna atan a pawimawh thu sawiin, dan loa pemlut an awm loh nan leh, ramri kaltlanga pawikhawihna, bungraw tawlhruk laka harsatna thleng te a sukiang thei a ni, tiin an sawi.