Royal Dutch Airlines-in 'Kaziranga National Park' hmang

KLM Royal Dutch Airlines chuan Amsterdam leh New York inkara an airline service Boeing 777-300ER aircraft chu Assam-a Kaziranga National Park hming chawiin a thlak.

Kaziranga National Park tia hming an thlak hi Boeing 777-300ER aircraft a ni a, hemi tur hian KLM lam chuan hun eng emaw chen campaign an lo kalpui tawh a ni. Boeing 777 aircraft chu United Nations Educational, Scientific and Cultural Organization (UNESCO)-in World Heritage site a puan hmun ṭhenkhat hmingchawiin alo thlak tawh bawk a ni. KLM Royal Dutch Airlines thuneitute chuan Boeing 777-300ER aircraft hming Kaziranga National Park tia an thlak chhan sawiin, ramngaw, thing leh mau chereu zel veng tura mipuite hnena campaign-na a nih thu an sawi. An hmalakna hi khawvel hmun hrang hranga environment leh wildlife conservation activist-te chuan an thlawp
ṭhat thu an sawi bawk. Assam sorkar chuan KLM-in KNP hming chawia an thawhtheihna hming an thlak chuan world heritage site-a puan Kaziranga National Park venhim leh tihhmasawnn kawngah nasa taka puih theih an beisei thu sawiin, lawmawm an tih thu a sawi.

KLM Royal Dutch Airlines hi kum 1919 aṭanga ding ṭan a ni a, Netherlands ram mai bakah Europe-a airlines hlun leh changtlung ber pawl a ni.

KLM board chuan Boeing 777-300ER aircraft, Kaziranga National Park hming puttir tur hian ngaihtuahna an lo seng tawh ṭhin tih sawiin, tunah a hlawhtlinna an hmu thei ta chu an lawm hle tih an sawi. Dutch national carrier chuan aircraft hmingthlak hi a pawmpui tawh niin an tarlang bawk. UNESCO-in World Heritage site a puan hnuin Kaziranga National Park hian ngaihven a hlawh zual hle a, Bristish lal tupa Price Willim-a te nupa pawhin kumin kumtir lama India an tlawh ṭum pawhin KNP-ah hian hun an hmang a ni.

Kaziranga National Park hi India rama lar leh hmingthang berte zing a mi a ni a, state sorkar leh sorkar laipui pawhin a dah pawimawh hle. He park-ah hian khawvel hmundanga hmuh tur awm zen zen lo samak ki pakhat nei an tih mai pawh an tam hle a, heng ramsa te hi mang mai thei dinhmunah an din bawk avangin a humhalh kawngah nasa taka ṭan lak a ni. Hetih lai hian sapeltute chuan heng samak te hi an kap fo a, a ki chu hmun hrang hrangah man to tak takin an thawn chhuak ṭhin a ni. Hemi titawp tur hian sorkar chuan chak takin hma a la. Assam Forest minister Atuwa Munda chuan nasa taka hma la in, Park enkawltu Director chu sapeltute nena inzawmna neiah puhin, suspend a lo ni tawh. Hetih lai hian hnathawktu ṭhenkhat chu an hna an tlin tawk loah puhin eng emaw zat ban an ni bawk. Hetih lai hian Kaziranga National Park hian harsatna a tawk nasa hle a, kumina Assam-a tuilian nasa tak avang khan a ram zau zawng 80% zet chu tuiin a chim a, ramsa eng emaw zatin nunna an chan a ni.