Manipur-ah NH 37 dan vangin Petrol Pump khar

Manipur-a Rongemei Naga Youth Front-te'n hmun hrang hrangah National Highway an dan avangin, state chhunga Petrol pump zawng zawngte chu khar vek a ni.

Rongemei Naga Youth Front-te chuan Thawhlehni zanlai aṭang khan Manipur leh Assam inkalpawhna, National Highway 37 chu hun rei tak siam ṭhat loha a awm avanga lungawi loin an dang a ni. NH dan a nih avang hian petrol leh nitin mamawh man a sang chak hle a, petrol chu litre khat Rs 120 te a ni. Petrol pump neitute chuan harsatna an tawh mekah state sorkar a inrawh loh avangin an harsatna chuan hun eng chen nge a awh dawn a an hriat loh thu an sawi. Sumdawngte chuan bungraw lakluh kawngah harsatna an tawk ve mek bawk a, hei hian nasa takin thil man a tisang niin an sawi.

Mi ṭhenkhat chu Myanmar ramri depa awm Moreh-ah petrol la tura kalin, to tak takin Imphal-ah an hralh chhawng leh ṭhin nia sawi a ni. Myanmar sorkarin hun eng emaw chen International Gate, Namphalong a khar hnuah a hawn leh tak avangin mi tam tak chu chakkhai lamin Moreh-ah hian an kal a ni. International Gate-ah hian Myanmar aṭanga lak petrol chu India petrol aiin a tlawm zawk bawk avangin, sumdawng leh mimalte chuan an pan nasa hle tih tarlan a ni.

Rongemei Naga Youth Front-te'n lungawi lohna lantira NH an dang hi pawl tam takin an thlawp thu an sawi tawh a, state sorkar chu hma la chak tawk lohah an ngai. NH 37 hi Border Roads Task Force (BRTF) enkawl lai a ni a, BRTF official chuan NH 37 hi December 15 hmaa siamṭhat hna thawh a nih tur thu an sawi nia tarlan a ni. State Works Minister K. Biren chuan Rongemei Naga Youth Front-te'n lungawi lohna lantira NH 37 an dan avang hian emergency meeting a lo ko tawh bawk.