All Tribal Students’ Union-te'n lungawilohna lantir zel

All Tribal Students’ Union Manipur (ATSUM) chuan Manipur University, Academic Council-in University Grants Commi-ssion guideline ang ni lo a admission a kalpui chu an dem thu sawiin, sût a nih loh chuan Manipur-a district pangaah lungawilohna lantira National Highway dan an tum thu an sawi.

ATSUM chuan Academic Council thutlukna sût tur hian vawi eng emaw zat an lo ngen tawh a, University-in Academic Council thutlukna a sût mai loh avangin Campus chhungah hun eng emaw chen lungawilohna an lantir tawh. Manipur University hian admission chungchangah hian UGC guidelines hmang loin, Manipur sorkarin tribal tana seat reservation a siam chu a hmang nia tarlan a ni. ATSUM chuan hei hi an duh loh thu sawiin, Manipur Univesrsity chu Central University a nih ang ngeia UGC Guidelines anga admission kalpui an duh thu leh, tribal tan a seat hausak pawh UGC Guidelines anga kalpui an phût. Tun dinhmunah MU-ah hian tribal tan seat 7.5% chauh hausak an ni a, UGC Guidelines-ah chuan tribal zirlaite tan seat 31% hausak tur nia tarlan a ni. October 3 aṭang khan tribal zirlai lungawilote chu an che chhuak ṭan a, University Campus chhunga building leh bungrua eng emaw zat an tihchhiat bakah, building ṭhenkhat chu hal a ni.

Hetih lai hian All Tribal Students’ Union Manipur (ATSUM) te hian nimin khan Manipur University, Academic Council thutluk duh lohna kawngzawh Imphal-ah an buatsaih a, All Naga Students’ Association Manipur (ANSAM) leh Kuki Students’ Organisation (KSO)-te'n thlawpna lantirin an telpui. Kawngzawhah hian Manipur hmun hrang hranga College leh Higher Secondary-a tribal zirlaite te chu an tel. Hetih lai hian Manipur University Tribal Students’ Union (MUTSU) pawhin MU hostel an chhuah-san thu an sawi. MUTSU hnuaiah hian tribal zirlai 900 vel an awm a, Manipur University-in reservation policy a kalpui dan chu
ṭha an tih loh thu sawiin, an thilphut a hlawhtlin hma loh chuan University-ah let an tum loh thu an sawi.

ATSUM-te chuan Mani-pur University hnuaia Academic Council thutlukna siam chungchangah Manipur Governor Dr Najma Heptulla hnenah memorandum an thehluh tur thu an sawi.