Khandu-a'n IRB dahbelh phut

Arunachal Pradesh Chief Miniter Pema Khandu chuan China, Myanmar leh Bhutan nena inrina, international border-ah Indian Reserve Battalion (IRB) dah belh turin sorkar laipui a ngen.

Chief Minister chuan Union home minister Rajnath Singh chu hemi chungchang hi New Delhi-ah a sawipui a, hmarchhak himna turin venhimna tichak tura a duh thu a hrilh. Khandu chuan kawng tam takah hmarchhak chu a hnufual tih sawiin, ramri depa awm a nih bawk avangin a him tawk lo hle tih a sawi. Ramri venhimna turin Deployment of Unmanned Aerial Vehicles (UAVs) emaw drone emaw dah ni thei se a duh thu sawiin, state police-te tan training institute changtlung tak hawn a duh thu Unoin minister a hrilh bawk.

Meghalaya khawpui Shillong-ah North Eastern Police Academy din a lo ni tawh a, hemi belhchhahna tur hi din ni thei se a duhawm hle ang tiin AP CM chuan a sawi. Arunachal Pradesh-ah hian IRB battalion nga dah mek an ni a, sorkar laipui chuan infrastructure senso 75% a tum bakah an mahni enkawlna senso 50% a tum sak a ni. Battalion khatah hian mi 1,000 zel an awm a ni. Tun hnai khan China chuan Arunachal epah indo thlawhtheihna a chhawp a, hei hian Arunachal himna a tiderthawng thei nia sawi a ni bawk.

Hmarchhak helpawl, United Liberation Front of Assam-Inde-pendent (ULFA-I) leh National Socialist Council of Nagaland-Isak Muivah (NSCN-IM) te chuan Arunachal Pradesh ram chhung hmun en emaw zat chu chettlat nan ber an hmang a ni.