Nagaland Governor-in ṭhalaite Red Cross-a inhmang turin a ngen

Nagaland governor leh Indian Red Cross Society president, Nagaland State Branch, La Ganesan chuan nimin khan World Red Cross Day puala Kohima-a Red Cross Complex-a hun hman chu a hmanpui. Mi dangte puihna kawnga thawh ho pawimawhna leh, a ṭha lama inthlak danglamna thleng tura ṭhalaite nasa zawka an chet chhuah a ṭul thute a sawi.

Kumin World Red Cross Day thupui atan hian "Through Humanity to Peace" tih hman a ni a, hei hi midangte natna leh harsatna chhawk zangkhai a, venghim tura an hun leh nunna thleng pete chawimawina atana tih a ni.

Governor Ganesan chuan Nagaland pum, a bikin chhiatrupna thlen tamna leh hmun hla tak taka Red Cross volunteer-te inpekna chu fakin, "In hna hi tih tur va thawh ringawt a ni lo, mipui khawngaihna leh lainatna ti langtu a ni," a ti. Red Cross member-te chu beiseina, lainatna leh ngilneihna lantirtu an ni tiin,harsatna lo thlen huna an pawimawhna leh hlutnate a sawilang bawk.

Nagaland ṭhalaite hnenah thinlung taka ngenna siamin, Governor chuan inthlak danglamna thlentu ni tura pen chhuak turin a chah. Naupan lai aṭanga mi dangte lainatna neih chhoh a ṭul thu sawiin, inchhung leh school-ah te inzirtir a ṭul thu a tarlang.