Assam : Panchayat inthlan thawh hnihna zo fel

Assam-a panchayat inthlan thawh hnihna leh hnuhnung ber chu May 7, Nilaini khan tluang taka zawh fel a ni ta. Central leh lower Assam-a district 13-ah vote nei zawng zawng nuai 91.31 zinga 56.71%-ten vote an thlak nia chhut a ni.

Polling station 12,130-ah zing dar 7:30 aṭanga tlai dar 4:30 thleng vote thlak niin, State Election Commission chuan tlai dar 3:30 thleng khan vote thlak zat chu 56.71% an tling niin an tarlang. Vote thlakna hmun hi Dhubri, South Salmara-Mankachar, Goalpara, Bongaigaon, Barpeta, Bajali, Nalbari, Kamrup, Kamrup (Metro), Hojai, Nagaon, Morigaon, leh Darrang te an ni. Heng zingah hian Bongaigaon district-ah vote tla tam berin 62.72% a ni a, Kamrup district-ah vote tla tlem berin 51.33% a ni thung.

Mi pawimawh zingah, chief minister Himanta Biswa Sarma chuan Kamrup district-a a bial Jalukbari, Amingaon Bengali Higher Secondary School-ah vote a thlak a ni. Official-te chuan vawiin hian polling station second phase-a buaina awm apiangah vote thlak ṭhat a nih tur thu an sawi. Inthlan thawh khatna leh thawh hnihnaa vote tlate hi May 11-ah chhiar a ni ang.

Inthlan thawh hnihnaah hian vote nei mi 91,31,127 an awm a, mipa 46,30,924, hmeichhia 44,99,952, leh third-gender 251 an ni. Zila Parishad, Anchalik Parishad, leh Gaon Panchayat inthlanah hian candidate 29,608 an awm.