Assam : CM-in Bihu festival ti tawp vek turin ngen

Assam chief minister Himanta Biswa Sarma chuan May 10 aṭanga Bihu festival neih tur la awm zawng zawng chu ṭhulh vek turin a ngen a, hei vang hian thla khat chhung awh tur festival lawmna chu tih tawp a ni zui ta a ni.

Chief Minister-in festival ti tawp tura a ngenna chhan hi sawi chian ni lo mah se, Pahalgam-a firfiak beihna thleng vanga India leh Pakistan inkar buaina thleng mek vang nia ngaih a ni.

Social media-a thuchhuah a siamah, CM Sarma chuan Assam mipuite chungah lawmthu sawiin, state puma Bihu lawmnaa phur taka an tel avangin lawmthu a hrilh. "Thla liamta chhung khan Assam pumah cultural event hrang hrang hmangin hlim takin Bihu kan hmang a, he huna tel leh thawhhlawk tak takte chungah thinlung takin lawmthu ka sawi a ni," a ti. Rongali Bihu, Magh Bihu tih bawk hi Assamese New Year lawmna niin, April thla laihawl aṭanga hman ṭan a ni a, thla khat a awh ṭhin a ni.

CM Sarma chuan hetih mek lai hian India leh Pakistan inkara buaina a zual zel avangin mipuite chu thu dik lo hnawl tur leh inkaihhruaina rintlak zawm turin a ngen bawk. India chu prime minister, Narendra Modi kaihhruaina hnuaiah inlungrual takin a ding a, thu dik lo (fake news) te chu hnawl turin leh, Indian Armed Force tih chhiat tumtute chu report turin a hriattir.

Sorkar laipui chuan Jammu and Kashmir, Rajouri Army brigade-te beih an nih thu leh, Punjab Jalandhar-a drone hmanga beih an nih thu social media ṭhenkhatin an sawi chu thu dik lo leh belhchian dawl lo tiin a lo hnawlsak tawh a ni.