Manipur: Rajya Sabha MP-in thla 2 chhungin sorkar din beisei

Manipur BJP aṭanga Rajya Sabha MP awmchhun, Maharaja Sanajaoba Leishemba chuan Pathianni khan thla khat emaw thla hnih emaw chhungin state chhungah sorkar din a nih theih a beisei thu sawiin, politics hruaitu zawng zawngte chu harsatna awmte sutkian kawngah inpumkhat turin a ngen.

Sanajaoba chuan, "Thla khat emaw thla hnih emaw chhungin sorkar din a nih ka ring. President's rule hmangin buaina a chinfel theih loh a, sorkar mumal tak neih a ngai a ni" tiin a sawi. Hei bakah hian mipui sawiselna chu a pawm thu sawiin, state-in buaina a tawh mekah mipui aiawhtu MLA tam takte chu an thawk ho thei lo a ni, a ti. BJP MP chuan, "State ṭhatna tur aiin mi mal duhthusam kan dah pawimawh a, President's rule hi Manipur hamṭhatna aiin thuneihna leh mahni hmasialna kan dah pawimawh zawk vanga puan a ni," tiin a sawi.

Tun hnai khan BJP northeast in-charge Sambit Patra chuan Manipur tlawhin, Churachandpur-ah hruaitu pawimawh tak tak a hmu a, chung zingah chuan May 4, 2023-a Imphal-a mipui pungkhawm beihna aṭanga damchhuak, Thanlon MLA Vungzagin Valte pawh a tel. Patra hian Churachandpur legislator L M Khaute leh Zomi Students Federation (ZSF) hruaitute kawm bawkin, anni hian memorandum an lo thehlut a ni. Hemi hnu hian Imphal-ah let lehin, chief mnister hlui N Biren Singh a a kawm a, he hunah hian MLA ṭhenkhat an tel bawk.

Patra hian Manipur MLA 21-te'n prime minister Narendra Modi leh home minister Amit Shah-te hnena lehkha thawn a, remna leh muanna awm theihna tura sorkar ngelnghet din tura an ngen aṭanga kar khat dawn liam hnuah a rawn tlawh a ni.