Meghalaya : CM-in CUET exam centre siamsak ennawn turin ngen

Meghalaya chief minister Conrad K Sangma chuan union education minister Dharmendra Pradhan hnenah ziaka ngenna thlenin, Common University Entrance Test (CUET) 2025 exam centre siam dan chungchangah rang taka hma la tura ngenin, zirlaite zingah harsatna nasa tak a siam a ni, tiin a sawi.

Chief Minister Sangma chuan state chhunga zirlai, CUET exam turten state pawna exam centre ruahman sak chungchanga lungawi lohna an lantir hnuah ngenna hi a siam a ni.

"Meghalaya aṭanga exam hmachhawn tur, a bik takin Shillong-a centre thlang tawh zirlai tam tak chu hmun hla tak tak, Jorhat, Dibrugarh, Mizoram, Nagaland, leh Kolkata centre-ahte dah an ni," tiin Chief Minister chuan Pradhan hnena lehkha a thawnah a ziak. "Meghalaya zirlaite state pawn lama exam centre ruatsak chuan zirlai tam tak, sum leh pai lama harsatna nei te chungah phurrit a siam a, zin leh riah man tam tak sen a ngai a ni," tiin Sangma chuan a sawi.

Sangma chuan hetianga zirlaite harsatna siamsak a nih ṭhin avang hian Union Ministry chu inrawlh tura ngenin, Minister Pradhan chu National Testing Agency (NTA) hnenah Meghalaya aṭanga zirlai exam turte tana CUET (UG) 2025 centre ruatsak an nih dan ennawn leh siamṭha turin a ngen. State zirlaite tan exam centre mamawh ang zat a awm hma chu exam sawnhlat mai dan pawh ngaihtuah turin a ngen bawk.