Arunachal : Economy tih hmasawnna atan mega oil palm drive kalpui

Arunachal Pradesh-a agriculture leh economy lam tih hmasawnna tur kawng atan Pathianni khan Lower Dibang Valley district huamchhunga Aara-Camp, Abali-ah mega oil palm plantation drive kalpui a ni.

'Sowing for a better future,' tih thupui hmanga hmalakna hi Agriculture, Horticulture, Animal Husbandry & Veterinary, leh Fisheries minister Gabriel D Wangsu-a'n a hawng. He hmalakna hi 3F Oil Palm chuan district agriculture office nen ṭangkawpin an buatsaih a; lo neih dan nghet leh hlawkthlak chawi larna tura hmalaknaah hian tualchhung loneitu, sorkar official leh agriculture lama stakeholder te an tel.

Wangsu chuan oil palm chin a pawimawh thu leh, state mission chauh ni loin ram pum mission a ni, tiin a sawi. Oil palm chingtu, tualchhung loneitute tumruhna leh hlawhtlinna chu lawmawm a tih thu sawiin, state chhunga bial dangte hnenah pawh an tawnhriat hrang hrangte hrilh hre turin a sawm bawk. An hmalakna hian an eizawnna a tih changtlung bakah, India-in agriculture lama intodelh a tumna kawngah pawh a pui dawn a ni, a ti.

MLA Puinnyo Apu chuan, prime minister Narendra Modi-a’n mi dang rinchhan loa India intodelhna tur hmathlir a neihte ti puitling tura pui turin loneitute a chah. Ram hmasawnna tura thawktu ṭha leh pawimawh tak an ni tih inhre turin a fuih bawk.