Manipur Minister-in hma lak pui turin Javedkar ngen

Manipur education minister Kh. Ratan Kumar chuan Union Minister for Human Resource Development Prakash Javadekar chu Manipur Unversity inrelbawlna chungchanga buaina chhuak chinfel pui turin a ngen.

Manipur University hi hmarchhak huam chhunga Central University changtlung ber pawl a ni. Mahse tun hnaia admission kalpui danah thil dik tawk lo a awm nia sawi a ni a, tribal zirlaite chuan seat hauhsak an nih danah lungawi loin campaus chhungah buaina an chawk chhuak a, hmun eng emaw zatah lungawi lohna lantirin an pungkhawm. Manipur-a tribal zirlaite chuan University thuneitute chu Academic Council-in admission kalpui dan tura thutlukna a lo siam tawh chu sût leh turin an phût. Tribal zirlai hostel-a awm te chuan hostel an chhuahsan a, an thil phût a hlawhlin hma loh chuan let an tum loh thu an sawi. Heng thil thleng chungchangah hian state education minister Ratan Kumar chuan Nilaini khan Union Minister hi a office chamber-ah hmuin an harsatna tawh mek te a thlen bakah, hma lak pui turin a ngen a ni.

Kumar chuan Prakash Javadekar chu Manipur University-in Vice Chancellor nghet a neih theih nan hma lak pui thuai turin a ngen a, Union minister chuan kar khat chhung ngeia hma lak a lo tiam. Manipur Education Minister chuan Academic Council thutukna siam avanga buaina inṭan a nih thu sawiin, chinfel thuai a nih loh chuan, state chhungah buaina nasa zawk an thlen theih thu a sawi bawk. University chu ni eng emaw chhung khar a ni tawh tih sawiin, zirlaite harsat tawh mek hrethiam a, chinfel thuai a nih theih nan hma lak pui turin Union Minister Javadekar chu a ngen.

Buaina chhuak vang leh, University chhunga tharum thawhna thleng vangin, Manipur University vice-chancellor lailawk M. Dhaneshwar chu a lo bang tawh a, a aiawh turin Jekendra chu ruat a ni. Manipur University hi Thawhṭanni zan dar sawm vel khan zirlai lungawiloten an bei chiam a, kangmei a chhuah bawk avangin bungrua eng emaw zat a chhia. Deparment zawng zawng khar nghal a ni a, thil theng hi chhui chian mek a ni. Manipur University Tribal Students’ Union (MUTSU) chuan tribal zirlaite tan seat 31% hauhsak an phût a ni. ATSUM te hian Academic Council-in University Grants Commission guideline ang ni loa admission an kalpui chu an dem thu sawiin, sût a nih loh chuan Manipur-a district pangaah lungawi lohna lantira National Highway dan an tum thu an lo sawi tawh a, Ningani khan kawngzawh an lo huaihawt tawh bawk.

ATSUM chuan Manipur Univesrsity chu Central University a nih ang ngeia UGC Guidelines anga admission kalpui an duh thu leh, tribal tan a seat hauhsak pawh UGC Guidelines anga kalpui an phût. Tun dinhmunah MU-ah hian tribal tan seat 7.5% chauh hausak an ni a, UGC Guidelines-ah chuan tribal zirlaite tan seat 31% hauhsak tur nia tarlan a ni. ATSUM-te hmalakna hi All Naga Students’ Association Manipur (ANSAM) leh Kuki Students’ Organisation (KSO)-te'n an thlawp bawk avangin buaina hi zual lam a pan zel a hlauhawm hle. ATSUM-te chuan state Governor Dr Najma Heptulla hnenah memorandum thehluh an tum bawk a ni.