Sorkar laipuiin Assam a ngaihsak tawk lo : Gogoi

Assam chief minister hlui Tarun Gogoi chuan China-in Brahmaputra lui fintu Xiabuqu lui hydro-electric project atana a khuah chu Assam tana thil pawi thei tak a nih laiin, Assam chunga thil thleng a nih vangin central-a BJP kaihhruai NDA sorkar chuan a ngaihthah niin a sawi.

Gogoi chuan, "Hemi chungchangah hian state sorkar chu hma la tura beisei leh expert committee-te pawh din a, chingfel vat tura beisei a ni. Assam mipuite tana Brahmaputra lui pawimawh zia kan hria a, kan nunna hnar pawimawh tak a ni. Hetih lai hian state sorkar chuan hma a la chak tawk lo hle a, chutih laiin sorkar laipui pawhin Assam state harsatna tawh theihte hre reng chungin a haider a ni" a ti. China-in Brahmaputra fintu Xiabuqu lui a khuah avang hian Assam-a loneitu leh thlai chingtute chu antuar ber tura ngaih an ni a, hetih lai hian tui intur a harsat theih bakah, ram leilung thlengin nghawng ṭha lo a nei thei dawn niin, a sawi. Heng bakah hian Brahmaputra lui ringa eizawng jati, mati leh bheti hnamte hmakhua chu a thim hle niin Gogoi-a chuan a sawi bawk.

Kumin-a Assam-in inthlan a hmachhawn dawn khan BJP chuan, state chhunga jati, mati leh bheti hnamte chu humhim a tiam bakah, an intunnunna tur thlenga ngaihtuah sak a tiam niin Gogoi chuan a sawi. Mahse BJP-te'n sorkarna an chan hnuah heng hnam te hian hriat an hlawh tawh lo a, BJP kaihhruai sorkar chuan an ham-
ṭhatna tur a ngaihtuah sak lo a ni, a ti bawk. Gogoi chuan chief minister a nih lai pawhin Modi-a chuan thil tam tak tih sak a tiam thu sawiin, a a hlawhtlinna erawh hmuh a ni ngai lo niin a sawi. Modi nen chuan China chungchang pawh an sawidun tawh thu leh, China President-in India a tlawh ṭuma China lui tui ṭhenkhat Assam tana pek ṭhen ve a tiam tawh pawh bawhzui a nih loh avangin a hlawhtling ta lo a ni, a ti.

China Foreign Minis-try chuan Brahmaputra lui fintu Tibet-a Xiabuqu lui khuah hian India-ah nghawng ṭha lo a neih loh tur thu a sawi reng a, India leh China inkarah inhriatthiam lohna a awm loh thu leh, inkungkaihna ṭha tak a awm niin a sawi fo bawk. China hian kum 2014 aṭang khan hyro-electric project hi a kalpui ṭan a, thla hmasa lawk khan Brahmaputra fintu lui khuah a nih thu hi a puang a ni.