NIA-in Nagaland sorkar chhui dawn

National Investigation Agency (NIA) team chuan Nagaland sorkarin deve-lopment fund, helho tana a pawtpeng ṭhin nia sawi chu a chhui chiang dawn.

NIA official chuan state sorkar chuan hel pawl ṭhenkhat tan sum a pawtpeng ṭhin nia tarlan chu sorkar laipui chuan tihtawp a duh tih sawiin, chhui chian a nih tur thu a sawi. Hel tamna leh eiruk hluarna state te chu India ramah pawh state hnufual an ni fo tih tarlan a ni. Sorkar laipui chuan dan kalha chhiah la ṭhin, helte khuahkhirh turin hma a la mek a, hetiang hel pawl hi eng emaw zat an awm a ni. Hetih lai hian Nagaland-a helpawl hlun leh lian tak, National Socialist Council of Nagalim (Isak-Muivah) chuan mipuite hnen aṭangin chhiah dik taka an lak thu an sawi ve thung. Helten dan kalha chhiah an lak titawp tur hian Against Corruption and Unabated Taxation (ACAUT) din a ni.

NIA hian Nagaland-a hel pawl pakhat, National Socialist Council of Nagaland - Khaplang(NSCN-K) te chet dan a chhui chiang dawn a, anni hian kum kalta chhung khan dan kalhin cheng nuai eng emaw zat chhiah an khawn nia tarlan a ni. Hemi chungchangah hian NIA chuan state sorkar chu insawifiah turin a lo hriattir tawh nia tarlan a ni bawk.