Arunachal-ah BJP MLA Minister atan la lut BJP-in state 14-ah rorelna fawng vuan

Arunachal Pardesh-a senior BJP MLA Tamiyo Taga chu Zirtawpni khan Chief Minister Pema Khandu-a kaihhruai, People’s Party of Arunachal (PPA) sorkar-ah council of ministers atan lakluh a ni a, BJP in state 14-a rorelna fawng a vawnna chiah a ni.

Arunachal-a Congress MLA 43-te'n People’s Party of Arunachal (PPA) an zawm hnuah PPA sorkar hi a ding a, BJP MLA Tamiyo Taga chu minister atana lakluh leh a nih tak vangin Aruanchal-ah PPA leh BJP te chuan sorkarna an siam ta a ni. Governor V Shanmuganathan chuan Raj Bhawan-a Darbar Hall-ah Tamiyo Taga chu rinawmna thu tiam tirin a lawm luh.

Minister lawmluhna in-khawm hi Chief Minister Pema Khandu, cabinet minister-te leh mi pawimawh eng emaw zatin an telpui. Tamiyo Taga hian Industries, Textiles and Handi-crafts and Cooperation Minister Tapang Taloh a thlak dawn a ni. Hemi chungchang hi Chief Minister chuan sawiin, "Mi thar la lut tur chuan midang thlauh thlak an ngaih chang a awm ṭhin, hei hi politics kal phung chu a ni" a ti.

Pema Khandu-a hi Congress hruaitu hlun tak niin, Supreme Court-in July 13 khan Arunachal Pradesh-ah Congress sorkar din leh turin thupek a chhuah a, Congress sorkar a din hnuah Chief Minister atana lakluh a ni. Khandu hian Congress sorkar paihthlak a nih laia chief minister Nabam Tuki a thlak a ni. Thla reilo te hnuah Congress MLA te chuan Central-a Congress party nen inzawmna chhu chatin, regional party People’s Party of Arunachal (PPA) chu September 16 khan an zawm a, Congress chu sorkarna siam zui theiloa awmin, Arunachal-ah PPA sorkar a ding zui a ni.

Arunachal Pradesh hian House member 60 neiin, an zingah PPA chuan MLA ngah berin 44 a nei a, BJP (11), Congress (3) leh Independent MLA 2 an awm mek a ni. People’s Party of Arunachal hi BJP kaihhruainaa din North East Democratic Alliance (NEDA) thlawptu a nih bawk avangin, ngaihven a hlawh hle. NEDA hi Congress party ni lo, hmarchhaka political party hrang hrang te awmna a ni.