Tripura BJP president motor suasam

Tripura BJP worker-te chuan an state BJP President Biplab Deb lirthei suasam a nih avangin kar kalta Inrinni khan lungawilohna an lantir a, police te nen an innawr buai zui.

Tharum thawhna thlengah hian mi eng emaw zatin hliam an tuar a, hliam tuar zingah hian police lam pawh an tel nia tarlan a ni. BJP worker hi mi 150 vel an ni a, an party leader Jawahar Saha leh Subal Bhowmik-te'n an ho a ni. Lungawi lote hian Chief Minister Manik Sarkar chenna in an pan a, police-te chuan lo dangin, an innawr buai zui ta a ni. Police-te chuan state BJP President motor, a chenna in kawta a dah chu Zirtawpni zan khan mi ṭhahnem tak truck-a chuangte chuan an susam niin an sawi.

He thil thleng hi Tri-na-mool Congress MLA Sudip Roy Barman chuan a dem thu sawiin, BJP worker-te chetdan pawh a dem tih a sawi. CPI-M state Secretary Bijan Dhar chuan he thil thleng hi chhui chian ngei an phut tih a sawi. Hetih lai hian Tripura BJP president Biplab Kumar Deb chuan amah beitute chu CPI(M) mi leh sa te an nih thu a sawi a, amah beitute chuan a in chhungah luhkhung an tum a, an luh theih loh avangin a motor chu an khawih zui ta mai niin a sawi bawk. Deb chuan CPI-M leh sa te hi an hruaitu Shantanu Bhattacharya hoa thawk chhuak niin a sawi a, pawi lian tham a thlen hmain Tripura State Rifles-te chuan an chhanhim hram niin a sawi.

He thil thlenga innhnamhnawiha puh mi ṭhenkhat chu police-te'n an man tawh nia tarlan a ni a, thubuai ziahluh a ni tawh bawk.