Tripura-a Lalit Kala Akademi NE Centre dinna tur tifel

Tripura khawpui, Agartala-a North East Regional Centre of Lalit Kala Akademi dinna turin Lalit Kala Akademi leh Tripura sorkar chuan inremna an siam.

Lalit Kala Akademi secretary Ramkrishna Vedanta leh Tripura Director of Information and Cultural Affairs, Ratan Biswas-te chuan centre dinna tur ram hmanna tura inremna hi an ziak a, Akademi vice chairman Dr Nandalal Thakur chuan a telpui bawk. 

Biswas chuan hmarchhak biala art and cultural activity chawilarna turin Lalit Kala Akademi tan hia North East Centre dinna turin ram, kum 99 chhung atana hman phalsak a ni tih a sawi. 

Kum 2018 khan chief minister Biplab Kumar Deb chuan centre dinna tur lungphum hi a lo phum tawh a, mahse a dinna tur ram hi official-a pek mai a ni lo. Hun eng emaw chen hnuah state sorkar chuan Nazrul Kalashetra-a ram chu centre dinna atan hman a remtih sak ta a ni. 

Lalit Kala Akademi hian kum 35 chhung regional centre a siam vawi khatna tur a ni. Centre hi peihfel a nih hunah chuan state chhunga artist hrang hrangte chuan painting, graphic arts, ceramic leh sculpture chungchanga workshop leh seminar-te an chhim thei dawn a ni. Kum 2018 aṭang khan Lalit Kala Akademi workshop buatsaihah Tripura aṭang hian artist 116 an lo tel tawh a ni.