Khandu leh Rijiju-te'n Kameng Hydro Electrict Project tlawh

Arunachal Pradesh Chief Minister Pema Khandu leh Union Minister of State for Home Affairs Kiren Rijiju-te chuan kar kalta Zirtawpni khan Megawatt 600 pechhuak thei tur, Kameng Hydro Electrict Project an tlawh.

CM Khandu leh MoS Rijiju-te hian hydropower project siam hna thawk mektu North Eastern Electrical Power Corporation (NEEPCO) Ltd. te kawmin, hma lak dan an sawiho a ni. NEEPCO official-te chuan February 2005 aṭanga hna ṭan a nih thu sawin, October 2017-ah project chu zawh fel a, hawn hman beisei a nih thu an lo hrilh. Tun hnai khan NEEPCO official, CM Pema Khandu-te chuan Prime Minister Narendra Modi an lo hmu tawh a, Kameng Hydro Electrict Project chu a hun takah hawn a nih thei nana hmalak dan tur an sawiho a ni.

Rijiju chuan NEEPCO official-te chu project a hun takah zawh a nih theih nana hmalakpui a tiam bakah, harsatna awm te Ministry of Power-ah thlensak a tiam. Hetih lai hian hnathawk tura state mi leh sa ngei, a tam zawk an luh theih nana hmalak pui a hreh loh thu a sawi bawk. Union Minister chuan Nafra hydroelectric project leh Dikshi project-te chu Ministry of Power kutah hlan a nih thu a sawi. NEEPCO official-te chuan hna 78% an zawh thu an lo hrilh a, a hun takah zawh theih an inbeisei tih an sawi.

Chief Minister leh Union Minister-te hian Bichom tuikhuahin a nghawng Bichom model village an tlawh a, harsatna an tawhte an enfiah a ni. Bichom tuikhuah hian Bichom khuaa chhungkaw 86 zet te chenna a nghawng buai nia sawi a ni. Parliamentary Secretary (PHE & WS) Kumsi Sidisow chuan heng harsatna tawk chhungkuate hi, state sorkar leh NEEPCO-te puihna in an chenna ngaihtuah sak an nih tawh thu a sawi. Parliamentary Secretary (Health & FW) Phurpa Tsering Bomdila, MLA Japu Deru leh West Kameng Deputy Commissioner Dr Sonal Swaroop-te chuan Chief Minister leh Union Minister-te hi an ṭawiawm a ni.

Union Minister Rijiju chuan Arunachal Pradesh hmun kilkawr zawka awm ten 3G internet service an hman ve theih nan sorkar laipui chuan cheng vaibelchhe 1500 a ruahman sak niin a sawi bawk.