Manipur-ah Congress a sorkar leh dawn : Ibobi

Manipur Chief Minister Okram Ibobi Singh chuan tun hnaiah an party MLA pathum chhuak mah se nghawng a neih loh tur thu sawiin, sorkarna an siam leh ngei dawn niin Thoubal Block Congress Committee buatsaih political conference-ah a sawi.

Chief Minister chuan an MLA bang ta te chungchang sawiin, "An mahni mimal duhthlanna a ni a, sawi theih kan nei lo. Buaina tur a awm lo a, sorkarna siam leh ngei turin hmalam panin kan kal zawk a ni" a ti. Ibobi Singh chuan Manipur mipuite chuan Congress sorkarah rinna an nghat tih sawiin nakkuma inthlan an hmachhawn turah pawh sorkarna siamtu tur chu Congress party a ni, a ti. Congress chuan kum 15 zet ro a rel chhungin state mipui tan hna tam tak a thawk a, chu chu mipuite pawhin an hria a ni tiin, hmachhawp tam tak la awmte tipuitling tur hian Congress chu a sorkar leh a ngai a ni, Ibobi Singh chuan a ti bawk.

Tun hnai khan Congress MLA Francis Ngajokpa chuan an party a chhuahsan a, party a chhuahsan chhan chu mipuite aṭanga nawrna nasa tak a awm vang niin Chief Minister chuan a sawi. Ngajokpa hma hian Congress MLA pahnih te chuan MLA an nihna aṭanga bangin party an lo chhuahsan tawh bawk a ni. Manipur-a tlang mite chuan Manipur Assembly-in "Anti-tribal bills" a pass avang lungawi loin, an MLA te chu Congress chhuahsan turin an nawr ve reng a ni.

Ibobi chuan central-a BJP kaihhruai NDA sorkar chu beiin, hmarchhak hmasawnna ngaih pawimawh tawk loah a puh. Union minister-te chuan hmarchhak state an tlawh fo tih sawiin, hmasawnna hna thawh a nih tur thu an sawi fo a, a taka hmuh tur erawh a awm chuang lo a ni, a ti. Chief Minister Okram Ibobi chuan state mipuite chu boruak ralmuang a awm theih nan hmalak puiah a sawm a, state sorkar hmalakna dodal zawnga che lo turin a ngen bawk.

Nakkum April thla khian Manipur Assembly Election neih a ni dawn a, rorel lai Congress party leh central-a rorel lai BJP te chu inbei leh hle tura ngaih an ni. Hetih lai hian Armed Forces Special Powers Act (AFSPA) hlih a nih theih nana beitu Irom Sharmila Chanu chuan, kum 16 chhung zet chaw nghei a kalpui tawh titawp a, polictics a luhchilh avangin boruak a nei lian hle tura ngaih a ni. Sharmila hian tun thla tir lam khan political party thar a din tur thu a lo sawi ve tawh a ni.

India Today-Axis Opinion Poll-in a tarlan dan chuan, Manipur-ah hian Congress chuan seat 19-24 inkar bak a lak an ring lo. State mipui 37% chuan BJP a sorkar an ring tawh thung. Hetiang boruak a awm mek lai hian, Congress MLA leh party vice-president hlui ni bawk Kh Loken Singh chuan kar kalta Zirtawpni khan BJP a zawm thu a puang. Loken hian May 11 khan Congress party a chhuahsan thu a lo puang tawh a, BJP a zawm ta tih a sawi. BJP thuchhuah chuan Congress ML pahnih Nongthombam Biren leh Francis Ngajokpa-te chuan na party an zawm dawn niin an tarlang bawk.