UN-in hmarchhakah Global University din remti

United Nations (UN) United Nations (UN) chuan India hmar-chhakah Global University din a nih tur thu a puang. UN hnuaiah hian Global University pakhat, Tokyo, Japan-ah chiah din a la ni.

Global university pahnihna tur din a nih theih nan hian UN, India sorkar leh India Federation of UN Associations-te chuan inremna an ziak a ni. Global university hi kum 2017-ah din hman tura beisei a ni. University hi din a nih hunah chuan khawvel hmun hrang hranga zirlaite an lut thei dawn a ni. UNESCO Association Secretary general Dr Aswini Sharma chuan, "Global university-ah hian course hrang hrang - arts stream, social sciences, management, science leh technology-ah te graduate, postgraduate leh scholar thlengin a zir theih dawn a ni" a ti.

University dinna tur hmun hi thlan fel a la ni lo a, Assam khawpui Guwahati-ah emaw Meghalaya khawpui Shillong-ah emaw din a ni ang. Assam sorkar leh Meghalaya sorkar-te hnenah University dinna tur hian ram acre 20-a zau dil a ni tawh a, Meghalaya sorkar chuan Shillong-ah din a nih thei nan a inhawng zau hle. Hetih lai hian Assam sorkar chuan Guwahati-ah din a nih theih nan hma a la ve mek bawk niin UNESCO official chuan a tarlang. UNESCO official chuan, "Global University dinna tur tih fel a la ni lo a, Assam-ah emaw Meghalay-ah emaw a rem chang zawk zawkah din a ni ang" tiin, a hmun thlan fel a la nih loh thu a tarlang.

United Nations leh Japan sorkar chuan inremna ziakin, kum 1973 khan a hmasa ber ni turin Global University chu Japan-a Tokyo-ah din a ni. Global University hi UN leh international academic ṭangkawpin an din a ni. Rector chu Global University enkawltu lu ber a ni a, United Nations Under-Secretary General tlukpui an ni. Global University din a nih chinah rector paruk an awm tawh a, tuna ni lai mek Dr. David M. Malone hian March 2013 aṭang khan a hna hi a chelh ṭan a ni.