Guwahati-ah Manipur Bhawan hawng

Manipur Chief Minister O Ibobi Singh chuan Ulubari, Guwahati-ah Manipur Bhawan a hawng a, state tan ṭangkai taka hman a beisei tih a sawi.

CM Singh chuan, Guwahati-ah Manipur Bhawan hawn a ni thei ta chu lawmawm a tih thu sawiin, Shillong-a Red Land an tih mai chu cheiṭha turin hma la mek a ni a, Meghalaya sorkarah ngenna thlen a ni, a ti. Manipur Bhawan din a nih theih nan hian kum 1990 aṭangin hmalak ṭan a nih thu sawiin, a sak nan cheng vaibelchhe 15 vel hmanral a ni tih a sawi. Building-ah hian Governor, CM, Minister leh VIP room a hrana siam a ni a, mi 90 awm theihna a ni. A sak hna hi kum 2004-05 aṭang khan ṭan niin, September 2016 khan zawhfel a ni. CM chuan thawktu mamawh belh a nih thu a sawi bawk. He hun hi Deputy Chief Minister Gaikhangam chuan kaihruaiin, Assam khawpuia-a Bhawan hawn theiha peihfel a ni ta chu ropui a tih thu a sawi. Manipur sorkar chuan Mumbai-ah Bhawan dang sa leh turin ruahmanna a kalpui mek a ni, a ti bawk.

Citizenship Amendment Bill pawm theih a ni lo : Ibobi

Manipur Chief minister Okram Ibobi Singh chuan Citizenship (Amendment) Bill 2016 chu pawm theih a nih loh thu Manipur Bhawan a hawnnaah hian a sawi. Chief Minister chuan, he bill hi pawm theih a ni lo, Assam-ah chuan BJP kaihhruai sorkar-in pawm mah se, mi mal leh pawl hrang hrang ten an thlawp lo a ni, a ti. Ibobi chuan, sorkar laipui chuan state zawng zawngte hmakhua a ngaihsak tur a ni, he bill hi Manipur tan chauh ni lo, hmarchhak pum tan a pawi thei hle dawn a ni, a ti.

Citizenship Amendment Bill hi Citizenship Act, 1955 thlak nana duan niin, Afghanistan, Bangladesh leh Pakistan ṭanga India-a Hindu, Sikh, Buddhist, Jain, Parsis leh Kristian pemlutte India khua leh tui an nih theih nana duan a ni. He bill duh lohna lantir hian Manipur Students’ Association-te chuan Jantar Mantar, New Delhi-ah kawng an lo zawh tawh a, Assam aṭangin Asom Jatiyatabadi Yuva Parishad leh Karbi Students’ Association-te'n thlawpin, Tripura Peoples’ Front pawhin an thlawpna lantirin an zawm ve bawk.

Guwahati-a Manipur Bhawan hawnna hun hi Works Minister Ksh Biren Singh, GAD Minister Korungthang, MLA - Th Shyamkumar, O Landhoni Devi leh Md Fazur Rahim-te'n an telpui a, anni bakah hian Chief Secretary O Nabakishore leh sorkar mi pawimawh eng emaw zatin an hmanpui a ni.