Assam-ah Tribal-te'n ST status pek dodal

Coordination Commi-ttee of the Tribal Organi-zations of Assam (CCTOA) te chuan sorkar laipuiin Assam-a hnam chi hrang paruk te Scheduled Tribe (ST) status pek a tum chu an duh lo tih sawiin, a tawp thlenga an dodal tur thu an sawi.

Sorkar laipuiin ST status pek tura a tih te hi - Koch-Rajbongshi, Tai-Ahom, Chutia, Moran, Motok leh tea tribe-te an ni. Coordination Committee chuan state sorkar leh sorkar laipuiin heng mite hnena ST status pe tura hma an la mek chu awm lo an tih thu sawiin, Assam-a Scheduled Tribes awmsa te zah lohna a ni, an ti. CCTOA-te hmalakna hi All Assam Tribal Sangha, All Assam Tribal Youth League, student union te leh hnam ṭhenkhat chuan an thawp tih an sawi. CCTOA chuan, heng hnam peng paruk te hnenah hian ST status pek a nih chuan, India danpui 'Sixth Schedule- in a phalsak angin, autonomous council-ah seat hausak hmangin an chhuh ve thei dawn a ni, an ti. Chu chuan kawng hrang hrangah harsatna a thlen thei niin an sawi a, tribal-te inkarah boruak
ṭha lo zawk a hrin chhuah an hlauh thu an sawi.

CCTOA-te hian Oc-tober 26 hian Dibrugarh-ah hemi chungchangah hian an hmalak zel dan tur an rel dawn a ni. November thlaa neih
ṭan tur Parliament Winter Session laiin, New Delhi-ah lungawi lohna latir an tum a, hei bakah hian Guwahati-ah November 26 hian lungawilohna kawngzawh buatsaih an tum a ni. Hetih lai hian Sadou Asom Muttock Yuba Chattra Sanmilan chu October 19 hian Assam-ah darkar 36 awh tur bandh huaihawt tumin an inbuatsaih a, November 1-ah darkar 72 awh bandh hauihawt leh an tum a ni. Sorkarin an duh anga hma a lak loh chuan November 10-ah Jantar Mantar-ah bandh huaihawt leh a nih tur thu an sawi.

Tun dinhmuna Assam-a ST status pek tawhte chu - Bodo, Rabha, Tiwa, Karbi, Dimasa, Mising, Sonowal, Hajong, Garo leh Deuri-te an ni.