Sharmila-i'n political party thar a din Chief Minister bialah a ding dawn

Manipur Human rights activist Irom Sharmila-i chuan Thawhlehni khan political party thar 'Peoples Resurgence and Justice Alliance (PRAJA)' a din a, Manipur legislative assembly election-ah a din tur thu a sawi nawn leh.

Manipur 'Iron Lady' Sharmila chuan, “PRAJA-in a tum ber chu dikna, inhriatthiam tawnna, hmangaihna leh remna awm tir a ni" a ti. Party thar a din thu a puanchhuah rual hian, Manipur legislative assembly election-ah an party chuan candidate 20 tal neih an tum thu sawiin, Thoubal leh Khurai bialah a ding dawn tih a sawi. Sharmila-i'n Manipur Chief Minister nilai Okram Ibobi-a bial, Thoubal-ah a khin tur thu a puan hian ngaih ven a hlawh hle a, hnehna a chang zo angem tih chu nakkum April thlaah a hriat theih dawn a ni. Sharmila-i hi an chenna Khurai bialah a ding dawn bawk a, hnehna chan ngei a inrin thu a sawi. Thoubal bialah hian chief minister ni lai Okram Ibobi Singh hi Congress ticket-a thlan tlin a ni. Kum 2002 aṭang khan chief minister nihna a lo chelh
ṭan tawh a, a term a hmang zo ṭep tawh a ni. Congress hian a zawnin term thum hnenhna an chang tawh a, kum 15 chhung ro an rel a ni.

Irom Sharmila-i chuan, “PRAJA-in a ngaih pawimawh hmasak ber chu Armed Forces (Special Powers) Act (AFSPA) hlih a nih theih nana hmalak a ni, tharum thawh-na reng reng kan do zel ang. Politics-a kan hlawhtlin theihna turin theih tawo kan chhuah dawn a, 'non-violence' chu kan au hla pawimawh a ni regn fo ang" a ti. PRAJA chuan mi pa leh hmeichhe inkarah intluktlanna a awm theih nan a thawk dawn tih sawiin, rethei leh hausa inkar hla lutuk siam-
ṭha tura an beih tur thu a sawi lang tel bawk.

Sharmila-i chuan AFSPA hlih a nih theihna turin chief minister a nih a ṭul thu leh, a tawp thlenga a beih tur thu uar takin a sawi. CM Ibobi chungchang sawiin, a bial mipuiten an thlawp ṭha hle a, mahse fiahna hautak hmachhawn turin pen chhuah a ngai a ni, a ti. Phai leh tlang mite inkarah eng indaidanna nge awm tih hriat a chak tawh tak zet tih a sawi. A duh ber chu chief miniter nih a, AFSPA hlip tura beih a nih thu a sawi leh bawk. PRAJA-in candidate 20 thehchhuah a tum zingah hian, candidate tur mi pali te chu tihchian tawh nia tarlan a ni.

Kumin August thla khan Sharmila-i chuan chaw nghei a titawp a, mahse a thil phut a hlawhtlin theih nan a bei zel dawn tih a sawi. "Hei hi ka nun a ni a, thutlukna siamtu chu keimah bawk ka ni. Intluktlanna a awm theih nan ka bei zel dawn a, chu mi tur chuan Manipur 'Iron Lady' hian ke a pen zel dawn a ni" tiin, awm mai mai a tum loh thu a sawi. Chawnghei a tihtawp hnua politics-a a luh tur thu sawitu hian pasal a neih tur thu a lo sawi tawh bawk.

Sharmila hian hmarchhak state leh Jammu & Kashmir-a Armed Forces Special Powers Act (AFSPA) hman mek chu duh loin, sipaiten an rinhlelh zawng dap theihna, man theihna leh civil mite chunga silai chelek theihna dan an nei chu hlih a nih theih nan a bei a ni. Assam Rifle-te'n Manipur-a civil mi eng emaw zat an thah hnuah, November 2, 2000 aṭang khan AFSPA duhlohna lantirin chaw nghei a kalpui a, kum 16 zet chaw a nghei hnuah kumin August khan a tawpsan ta a ni. Sharmila hi mi tam tak chuan India ‘Iron Lady’tih hialin an sawi ve bawk a ni.