Manipur-ah Congress MLA 2-in BJP zawm

Manipur-a Congress MLA hlui pahnihte chuan Thawhṭanni khan Bharatiya Janata Party (BJP) an zawm thu an puang.

Congress MLA hlui te hi N Biren leh Francis Ngajokpa-te an ni a, lawmluhna inkhawm hi Imphal-ah neih a ni. He hun hi BJP National General Secretary Ram Madhav, BJP National Democratic Alliance Convenor Himanta Biswa Sarma leh State BJP President Bhabananda-te chuan an hmanpui a ni.

Ngajokpa hi October 13 khan MLA a nihna aṭangin a lo bang tawh a, N Biren pawh hian October 6 khan MLA a nihna alo bansan tawh. MLA hlui pahnih-te hian Congress chhuahsanin BJP an zawm a, Manipur Assembly Election neih turah candidate tura beisei an ni. Ngajokpa chuan MLA a nihna a bansan chhan sawiin, a dinna Senapati district-a Tadubi bial mipuite nawrna vang a nih thu a sawi. Manipur-ah hian MLA eng emaw zat chu an bial mipuiten Congress chhuahsan turin an nawr fo a, a bikin tlang mite (tribal) chu Congress sorkarin 'Anti-tribal bill' a pass vangin an lawm lo hle a, tribal MLA-te chuan bang tura nawrna an tawk nasa zual nia tarlan a ni. Hetih lai hian N Biren chuan CM Ibobi Singh kaihhruai sorkar-ah inrelbawlna a mumal tawk lo nia sawiin, a chhuahsan ta tih a sawi.

September thal khan Congress MLA Y hlun Erabot chuan Congress party chhuahsanin BJP a lo zawm tawh bawk a ni.